ຫົວ​ຂໍ້ : ທ່ານຮອງນາຍົກ ຮ່ວມພົບປະການເຂົ້າຫາແຫຼ່ງທຶນ

ເຜີຍ​ແຜ່​ໂດຍ​: algi@admin ເວ​ລາ: 28/02/2020 04:42:45 ຈຳ​ນວນ​ຜູ້​ເຂົ້າ​ຢ້ຽມ​ຊົມ 182 ຄັ້ງ

   ກອງປະຊຸມພົບປະລະຫວ່າງ ຂະແໜງທະນາຄານ ແລະ ພາກທຸລະກິດ ກ່ຽວກັບການເຂົ້າຫາແຫຼ່ງທຶນ ໄດ້ຈັດຂຶ້ນໃນຕອນເຊົ້າຂອງວັນທີ 11 ພະຈິກ 2016 ທີ່ຫໍປະຊຸມແຫ່ງຊາດ (ຫຼັກ 6). ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ເຊິ່ງມີບັນດາທ່ານລັດຖະມົນຕີ, ຮອງລັດຖະມົນຕີ, ກົມກອງ ຈາກກະຊວງທີ່ກ່ຽວຂ້ອງ, ທະນາຄານແຫ່ງ ສປປ ລາວ, ບັນດາຜູ້ຕາງໜ້າຈາກທະນາຄານທຸລະກິດ ແລະ ນັກທຸລະກິດ-ຜູ້ປະກອບການ ເຂົ້າຮ່ວມ.
   ກອງປະຊຸມ ໄດ້ຮັບຟັງການສະເໜີສະພາບລວມ ດ້ານນະໂຍບາຍ ແລະ ລະບຽບການ ກ່ຽວກັບການເຂົ້າຫາແຫຼ່ງທຶນ ຈາກທະນາຄານແຫ່ງ ສປປ ລາວ, ການລາຍງານສະພາບການຈັດຕັ້ງ ປະຕິບັດວຽກງານສິນເຊື່ອ, ລະບຽບການ ແລະ ຂໍ້ສະດວກ-ຂໍ້ຫຍຸ້ງຍາກ ໃນການບໍລິການດ້ານແຫຼ່ງທຶນ ຈາກສະມາຄົມທະນາຄານທຸລະກິດ ແລະ ການລາຍງານສະພາບລວມ ກ່ຽວກັບການເຂົ້າຫາ ແຫຼ່ງທຶນ, ຂໍ້ສະດວກ-ຂໍ້ຫຍຸ້ງຍາກ ໃນໄລຍະຜ່ານມາ ແລະ ຂໍ້ສະເໜີຕ່າງໆ. ພ້ອມນີ້, ບັນດາຜູ້ເຂົ້າຮ່ວມ ກໍ່ໄດ້ມີການປຶກສາຫາລື ແລະ ແລກປ່ຽນຄຳຄິດຄຳເຫັນ ຮ່ວມກັນ ເພື່ອຊອກຫາວິທີການ ແກ້ໄຂບັນຫາ.    ໂອກາດນີ້, ທ່ານຮອງນາຍົກລັດຖະມົນຕີ ກໍ່ໄດ້ກ່າວວ່າ: ກອງປະຊຸມໃນຄັ້ງນີ້ ຈັດຂຶ້ນເພື່ອຈັດຕັ້ງປະຕິບັດ ແລະ ຜັນຂະຫຍາຍຜົນຂອງກອງປະຊຸມ ທີ່ທ່ານນາຍົກລັດຖະມົນຕີ ໄດ້ພົບປະນັກທຸລະກິດ ໃນທ້າຍເດືອນກໍລະກົດ 2016 ທີ່ຜ່ານມາ ໃຫ້ປະກົດຜົນເປັນຈິງ ຊຶ່ງໄດ້ສະເໜີລັດຖະບານ ຊ່ວຍພິຈາລະນາແກ້ໄຂໃນຫຼາຍບັນຫາ ເຊັ່ນ: ການເຂົ້າຫາແຫຼ່ງທຶນ, ຄ່າຂົນສົ່ງແພງ ແລະ ການປັບປຸງລະບອບລະບຽບການ ເພື່ອອຳນວຍຄວາມສະດວກ ໃນການດຳເນີນທຸລະກິດ ໃຫ້ນັບມື້ນັບດີຂຶ້ນ. ແຕ່ກໍ່ຍັງມີບາງບັນຫາສຳຄັນ ທີ່ຂະແໜງການທີ່ກ່ຽວຂ້ອງ ທັງພາກລັດ ແລະ ພາກທຸລະກິດ ຕ້ອງໄດ້ມີການປຶກສາຫາລືຮ່ວມກັນຢ່າງລະອຽດ, ກວດກາຄືນການຈັດຕັ້ງປະຕິບັດຜ່ານມາ ກ່ຽວກັບອຸປະສັກໃນການດຳເນີນທຸລະກິດຢູ່ ສປປ ລາວ ຊຶ່ງຈາກບົດລາຍງານ ໃນເດືອນຕຸລາ 2016 ຂອງທະນາຄານໂລກ (World Bank's Doing Business) ກ່ຽວກັບການຈັດລະດັບປະເທດທີ່ມີຄວາມຍາກ ແລະ ງ່າຍ ໃນການດຳເນີນທຸລະກິດ ຢູ່ 190 ປະເທດໃນທົ່ວໂລກ ເຫັນວ່າ ປະເທດລາວ ໄດ້ຈັດຢູ່ໃນອັນດັບ 139 ຈາກອັນດັບ 134 ໃນປີຜ່ານມາ ແລະ ຈັດຢູ່ໃນອັນດັບທີ 9 ຂອງບັນດາປະເທດອາຊຽນ ທີ່ເປັນຕົວຊີ້ບອກຫຼາຍອັນ ທີ່ຈະຕ້ອງໄດ້ຮ່ວມກັນປຶກສາຫາລື ແລະ ປັບປຸງແກ້ໄຂ ລວມທັງການເຂົ້າຫາແຫຼ່ງທຶນ.
   ພ້ອມນີ້, ທ່ານຍັງໄດ້ຍົກໃຫ້ເຫັນ ບັນຫາທີ່ເປັນອຸປະສັກຕົ້ນຕໍ ໃນການເຂົ້າຫາແຫຼ່ງທຶນ ຂອງບັນດາຫົວໜ່ວຍທຸລະກິດ ຢູ່ປະເທດລາວ ທີ່ມີຢູ່ 1 ແສນກວ່າຫົວໜ່ວຍ ແລະ ເມື່ອທຽບໃສ່ບັນດາ ປະເທດທີ່ກຳລັງພັດທະນາອື່ນໆ ກໍ່ບໍ່ແຕກຕ່າງກັນຫຼາຍ. ໂດຍອີງຕາມຜົນການສຶກສາ ການພັດທະນາ ແລະ ສົ່ງເສີມທຸລະກິດຂະໜາດນ້ອຍ ແລະ ກາງ ຢູ່ບັນດາປະເທດກຳລັງພັດທະນາ ເຫັນວ່າ ປະມານ 80 ສ່ວນຮ້ອຍ ຂອງບັນດາທຸລະກິດ ພົບຄວາມຫຍຸ້ງຍາກໃນການເຂົ້າຫາແຫຼ່ງທຶນ ຍ້ອນເງື່ອນໄຂ ແລະ ມາດຖານ ຍັງບໍ່ຄົບຖ້ວນຕາມລະບຽບການ ທີ່ສະຖາບັນການເງິນໄດ້ກຳນົດໄວ້ ເຊັ່ນ: ບໍ່ມີປະສົບການໃນການດຳເນີນທຸລະກິດ, ຂາດຫຼັກຊັບຄໍ້າປະກັນ ແລະ ຂາດປະຫວັດຂໍ້ມູນທາງການເງິນ ທີ່ເຊື່ອຖືໄດ້. ໃນຂະນະທີ່ ບັນດາຫົວໜ່ວຍທຸລະກິດ ແມ່ນຕ້ອງການກູ້ຢືມທຶນໃນອັດຕາ ດອກເບັ້ຍຕໍ່າ, ມີຄວາມວ່ອງໄວ, ບໍ່ຫຍຸ້ງຍາກໃນການກະກຽມເອກະສານ ແລະ ບໍ່ຕ້ອງມີຫຼັກຊັບຄໍ້າປະກັນໃນການກູ້ຢືມເງິນ ເພາະຄິດວ່າທຸລະກິດຂອງຕົນ ສາມາດສ້າງກຳໄລ ແລະ ຈະໃຊ້ໜີ້ໄດ້. ດ້ານໜຶ່ງ, ສະຖາບັນການເງິນ ໃນຖານະທີ່ເປັນຫົວໜ່ວຍທຸລະກິດ ກໍ່ໄດ້ວາງລະບຽບການ ແລະ ຂັ້ນຕອນທີ່ຮັດກຸມ ເພື່ອຄັດເລືອກລູກຄ້າ ທີ່ມີຄວາມໜ້າເຊື່ອຖື, ມີວິໄນທາງດ້ານການເງິນ ແລະ ມີຄວາມສາມາດທີ່ຈະຊຳລະໜີ້ຄືນໄດ້ ເພື່ອຮັບປະກັນໃຫ້ການດຳເນີນທຸລະກິດຂອງທະນາຄານ ມີຄວາມໝັ້ນຄົງ.


ແຫຼ່ງຂ່າວຈາກ: ເວັບໄຊລັດຖະບານ

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​