ຫົວ​ຂໍ້ : ພິທີປິດໂຄງການຮ່ວມມືລະຫວ່າງ ກະຊວງອຸດສາຫະກຳ ແລະ ການຄ້າ ກັບກຸ່ມສະຫະປະຊາຊາດ (MOIC-UN Trade Cluster Project)

ເຜີຍ​ແຜ່​ໂດຍ​: algi@admin ເວ​ລາ: 27/02/2020 22:47:31 ຈຳ​ນວນ​ຜູ້​ເຂົ້າ​ຢ້ຽມ​ຊົມ 165 ຄັ້ງ

   ໃນວັນທີ 27 ກັນຍາ 2016 ເວລາ 16:00 ໂມງ ທີ່ໂຮງແຮມຫຼວງພະບາງວີວ ແຂວງຫຼວງພະບາງ ໄດ້ມີພິທີປິດໂຄງການຮ່ວມມືລະຫວ່າງ ກະຊວງອຸດສາຫະກຳ ແລະ ການຄ້າ ກັບກຸ່ມ ສະຫະປະຊາຊາດ ເພື່ອການພັດທະນາດ້ານການຄ້າ (MOIC-UN Trade Cluster Project) ຢ່າງເປັນທາງການໂດຍການໃຫ້ກຽດເປັນປະທານຮ່ວມລະຫວ່າງ ທ່ານ ຄຳຂັນ ຈັນທະວີສຸກ ເຈົ້າແຂວງໆຫຼວງພະບາງ ແລະ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງ ອຸດສາຫະກຳ ແລະ ການຄ້າ ພ້ອມດ້ວຍ ທ່ານຮອງເຈົ້າແຂວງຫຼວງພະບາງ ແລະ ບັນດາຫົວໜ້າກົມ, ຮອງຫົວໜ້າກົມ, ຫົວໜ້າກພະແນກ,ຮອງຫົວໜ້າພະແນກຈາກສູນກາງ ແລະ ທ້ອງຖີ່ນທີ່ກ່ຽວຂ້ອງກໍ່ໃຫ້ກຽດເຂົ້າຮ່ວມຢ່າງພ້ອມພຽງ, ໃນພິທີອັນສຳຄັນດັ່ງກ່າວ ທ່ານ ສົມຫວັງ ນິນທະວົງ ຫົວໜ້າກົມສົ່ງເສີມ ແລະ ພັດທະນາສິນຄ້າ ທັງເປັນຫົວໜ້າໂຄງການ ໄດ້ໃຫ້ກຽດຂື້ນລາຍງານສະພາບການຈັດຕັ້ງປະຕິບັດທີ່ຜ່ານມາໃນໄລຍະ 06 ປີ ແລະ ໝາກຜົນທີ່ໄດ້ຮັບວ່າ:
   ຂ້າພະເຈົ້າ ມີຄວາມຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງທີ່ີໄດ້ຕາງໜ້າໃຫ້ ຄະນະຮັບຜິດຊອບໂຄງການ ກະຊວງ ອຸດສາຫະກຳ ແລະ ການຄ້າ ແລະ ກຸ່ມສະຫະປະຊາຊາດ ເພື່ອການພັດທະນາດ້ານການຄ້າ ຂຶ້ນມາລາຍງານການຈັດຕັ້ງປະຕິບັດໂຄງການຕະຫລອດລະຍະຂອງການຈັດງານທີ່ຜ່ານມາ
- ກະຊວງ ອຸດສາຫະກຳ ແລະ ການຄ້າ ພາຍຫລັງທີ່ຖືກມອບໝາຍຈາກລັດຖະບານໃຫ້ເປັນເຈົ້າການກະກຽມເຂົ້າເປັນສຳມາຊິກ ອົງການການຄ້າໂລກ ແລະ ການເຊື່ອມໂຍງເຂົ້າສູ່ພາກພື້ນ ແລະ ສາກົນ ນັ້ນໄດ້ຮັບທຶນຈາກອົງການຈັດຕັ້ງສາກົນເພື່ອຊ່ວຍສ້າງຄວາມເຂັ້ມແຂງໃຫ້ແກ່ທັງພາກລັດ ແລະ ທຸລະກິດ ກົມສົ່ງເສີມ ແລະ ພັດທະສາສິນຄ້າ ໄດ້ຮັບການຈັດສັນງົບປະມານຈຳນວນໜຶ່ງ ເພື່ອສ້າງຄວາມອາດສາມາດໃນການແຂ່ງຂັນເພື່ອສົ່ງອອກ ແລະ ໄດ້ເຮັດການສຶກສາຄວາມເປັນໄປໄດ້ໃນການສ້າງໂຄງການຢູ່ຫລາຍແຂວງ ໃນນີ້ກໍ່ລວມມີແຂວງຫລວງພະບາງ ຊຶ່ງຜ່ານການສຶກສາກໍ່ເຫັນວ່າ ແຂວງມີຫລາຍທ່າແຮງ ແລະ ມີຫຼາຍວຽກງານທີ່ຕ້ອງໄດ້ສືບຕໍ່ເອົາໃຈໃສ່ ສິ່ງທີ່ພົບເຫັນ ແມ່ນແຂວງໄດ້ມີທ່າແຮງມະຫາສານ ໃນເລື່ອງການທ່ອງ ທ່ຽວ ອັນຈະເປັນຕະຫຼາດກັບທີ່ ໃຫ້ແກ່ສິນຄ້າຫັດຖະກຳ ແລະ ກະສິກຳ ຫລາຍຫົວໜ່ວຍທຸລະກິດ ພາຍໃນໄດ້ຫັນມາດຳເນີນການໃຫ້ບໍລິການດ້ານໂຮງແຮມ, ບ້ານພັກ ແລະ ຮ້ານອາຫານ ໂດຍມີມາດຕະຖານໃນການບໍລິການທີ່ຍັງຕ້ອງໄດ້ຮັບການປັບປຸງໃຫ້ໄດ້ມາດຕະຖານ ໂດຍສະເພາະແມ່ນເລື່ອງຄວາມປອດໄພທາງດ້ານອາຫານ, ການໃຊ້ຊັບພະຍາກອນທີ່ປະຢັດ (ນ້ຳປະປາ ແລະ ໄຟຟ້າ) ທັງເປັນການປົກປັກຮັກສາສິ່ງແວດລ້ອມ, ເຄື່ອງຫັດຖະກຳແມ່ນມີຈຳໜ່າຍຈາກຫລາຍທ້ອງຖິ່ນທັງຈາກພາຍໃນ ແລະ ຕ່າງປະເທດ ມີທັງຂອງແທ້ ແລະ ຂອງລອກຮຽນແບບ, ສິນຄ້າກະສິກຳທີ່ສະໜອງເຂົ້າເປັນອາຫານ ກໍ່ຍັງຕ້ອງນຳເຂົ້າຈາກທ້ອງຖິ່ນອື່ນ ທັງໆທີ່ພາຍໃນກໍ່ມີທ່າແຮງໃນການຜະລິດ ແລະ ສະໜອງໄດ້.
- ຈາກຂໍ້ມູນອ້າງອີງ ທີ່ກ່າວມານັ້ນ ທາງກົມໄດ້ສ້າງໂຄງການຂຶ້ນ ແລະ ໄດ້ຂໍການສະໜັບສະໜູນຈາກອົງການເຊໂກ(SECO) ຫລື ລັດຖະບານ ສະວິດສະແລນ ໂຄງການນີ້ເປັນໂຄງການທົດລອງ ຂອງ UN ຢູ່ໃນປະເທດດ້ອຍພັດທະນາ ໂດຍໄດ້ຄັດເລືອກເອົາ ສປປ ລາວເປັນບ່ອນທົດລອງທຳອິດ ດ້ວຍມູນຄ່າໂຄງການໃນເບື້ອງຕົ້ນ 4,04 ລ້ານໂດລາສະຫະລັດ ໂດຍເລີ່ມ ແຕ່ ປີ 2011 ເຖິງ 2014 ແລະ ເພິ່ມອີກ 1,38 ລ້ານໂດລາ ເພື່ອສືບຕໍ່ໂຄງການ ຈົນຮອດ ເດືອນ ກັນຍາ 2016 ລວມທັງໝົດ 5,42 ລ້ານ ໂດລາ. ຈຸດປະສົງຫລັກຂອງໂຄງການ ແມ່ນພັດທະນາ ອຸດສາຫະກຳການທ່ອງທ່ຽວໃຫ້ມີມາດຕະຖານ ຮັບປະກັນໄດ້ ຄວາມປອດໄພ ດ້ານອາຫານ ປະຫຍັດພະລັງງານ ເປັນມິດຕໍ່ສິ່ງແວດລ້ອມ ກ້າວໄປເຖິງຄວາມຍືນຍົງ ເປັນຕະຫລາດຖາວອນ ໃຫ້ແກ່ ສິນຄ້າຫັດຖະກຳ ແລະ ການຜະລິດສິນຄ້າກະສິກຳຂອງແຂວງ ຄາດໝາຍຂອງໂຄງການ ໄດ້ແບ່ງໄວ້ເປັນ 5 ຄາດໝາຍຄື:
ຄາດໝາຍທີ 1: ມາດຕະຖານຄວາມປອດໄພດ້ານອາຫານ, ຄຸນນະພາບຂອງການບໍລິການ ແລະມາດຕະຖານ ດ້ານສິ່ງແວດລ້ອມໄດ້ຮັບການປັບປຸງພາຍໃນຂະແໜງທ່ອງ ທ່ຽວໂດຍຜ່ານການນຳໃຊ້ ເຄື່ອງ ໝາຍຢັ້ງຢືນຄຸນ ນະພາບ ແບບສະໝັກໃຈ.
ຄາດໝາຍທີ 2: ທັກສະຂອງພະນັກງານທີ່ເຮັດວຽກໃນຂະແໜງການທ່ອງທ່ຽວໄດ້ຮັບການຍົກລະດັບ.
ຄາດໝາຍທີ 3: ສ້າງການເຊື່ອມໂຍງແບບຮອບດ້ານກັບຂະແໜງການທີ່ໄດ້ຖືກຄັດເລືອກ ໂດຍສະເພາະແມ່ນຜະລິດຕະພັນກະສິກຳອິນຊີ ແລະ ຫັດຖະກຳຜ້າໄໝ ໃນອຸດສາຫະກຳການທ່ອງທ່ຽວ.
ຄາດໝາຍທີ 4: ເສີມສ້າງຄວາມເຂັ້ມແຂງໃຫ້ແກ່ລັດຖະບານລາວ ໃນຂົງເຂດຂອງນະໂຍບາຍການຄ້າ ແລະ ມາດຕະການກີດກັນທີ່ບໍ່ແມ່ນພາສີ(Non-Tariff Measure), ປັບປຸງໂອກາດໃນການ ສົ່ງອອກຂອງຜະລິດຕະພັນຜ້າໄໝທີ່ມີຄຸນນະພາບສູງ ແລະ ຜະລິດຕະພັນກະສິກຳອິນຊີ .
ຄາດໝາຍທີ 5: ປະກອບສ່ວນໃນການປັບປຸງຜະລິດຕະພັນຂອງການທ່ອງທ່ຽວ ໂດຍຖືເອົາຫັດຖະກຳຜ້າໄໝ ແລະ ກະສິກຳອິນຊີ ໂດຍຜ່ານການຜະລິດ ແລະ ເສີມສ້າງກຸ່ມການຄ້າຂອງ ນັກທຸລະກິດ.
ການຈັດຕັ້ງປະຕິບັດໂຄງການດັ່ງກ່າວ ແມ່ນມີລັກສະນະພິເສດແຕກຕ່າງຈາກຫລາຍໂຄງການໃນລາວ ເນື່ອງຈາກ ກຸ່ມສະຫະປະຊາຊາດ ທີ່ລວມມື 4 ອົງການ ສຳຄັນຄື ILO, UNIDO, ITC and UNTAD ເປັນຜູ້ຮັບທຶນ ແລະ ຈັດຕັ້ງປະຕິບັດກິດຈະກຳຕົວຈິງ ໂດຍນຳໃຊ້ທ່າແຮງຂອງແຕ່ລະອົງກອນເຂົ້າເຮັດວຽກຮ່ວມກັບແຂວງ ສ່ວນ UNOPS ແມ່ນເປັນຜູ້ບໍລິຫານທຶນ.
ຂັ້ນສູນກາງ, ມີບັນດາກົມຈາກຫລາຍກະຊວງ ເປັນຄູ່ຮ່ວມໃນການຈັດຕັ້ງປະຕິບັດ ໂດຍມີກົມສົ່ງເສີມ ແລະ ພັດທະນາສິນຄ້າ ກຊ ອຄ ເປັນຫົວໜ້າໂຄງການ ແລະ ເປັນຈຸດປະສານງານ ແລະ ຕິດຕາມລົງເລິກ ການເຄື່ອນໄຫວຂອງ ສາກົນ ແລະ ແຂວງ ໃນການຈັດຕັ້ງປະຕິບັດກິດຈະກຳຕ່າງໆ.
ໃນຂັ້ນແຂວງ ທີ່ປະກອບດ້ວຍ ພາກລັດຈາກຫລາຍຂະແໜງການ ແລະ ເອກະຊົນ ລວມທັງປະຊາຊົນ ຖືວ່າເປັນຜູ້ຮ່ວມຈັດຕັ້ງ ກິດຈະກຳຕົວຈິງ ກັບບັນດາຊ່ຽວຊານທີ່ຖືກສົ່ງມາ ຈາກ 4 ອົງກອນສະຫະປະຊາຊາດ ຫລັກໆ ຂ້າງເທິງ .
• ຜ່ານການຈັດຕັ້ງປະຕິບັດຕົວຈິງ ຕະຫລອດໄລຍະ 6 ປີ ຜ່ານມາສັງລວມໄດ້ໝາກຜົນດັ່ງລູ່ມນີ້:
ຜົນໄດ້ຮັບຈາກຄາດໝາຍ ທີ1: ສຳເລັດການສ້າງ ກາໝາຍຢັ້ງຍືນມາດຕະຖານ ຫລວງພະບາງ ປອດໄພ ແລະ ສີຂຽວ ຊຶ່ງເປັນມາດຕະຖານທີ່ຢັ້ງຢືນຄວາມປອດໄພດ້ານອາຫານ ໂດຍປະຈຸບັນໄດ້ມີ ໂຮງແຮມ ແລະ ຮ້ານອາຫານ 40 ຫົວໜ່ວຍ ໄດ້ຮັບ ກາໝາຍ. ການດຳເນີນການຢັ້ງຢືນ ແມ່ນ ສະຖາບັນລານິດເປັນຜູ້ດຳເນີນການກວດສອບ ແລະ ໃຫ້ຄຳແນະນຳເພື່ອຍົກລະດັບໃຫ້ໄດ້ມາດຕະຖານ ແລະ ນຳໃຊ້ຫ້ອງທົດລອງທີ່ໂຄງການໄດ້ສົມທົບຊ່ວຍເຫຼືອ ທາງດ້ານອຸປະກອນ ແລະ ຍົກລະດັບໃຫ້ແກ່ພະນັກງານຂອງຫ້ອງທົດລອງ ມະຫາວິທະຍາໄລ ສຸພານຸວົງ ເພື່ອກວດສອບ ຄວາມປອດໄຟ ຂອງອາຫານແລະເຄື່ອງດື່ມ.
ຜົນໄດ້ຮັບ ຈາກຄາດໝາຍ ທີ 2: ສຳເລັດ ການພັດທະນາ 2 ຫລັກສູດ ( Good Practice Guide and Know about Business) ເພື່ອຍົກລະດັບພະນັກງານທີ່ໃຫ້ບໍລິການ ຢູ່ໃນໂຮງແຮມ ແລະ ບ້ານພັກ ໃຫ້ສູງຂຶ້ນ ແລະ ນຳໃຊ້ເຂົ້າໃນການຮຽນການສອນໃນຂັ້ນ ມັດທະຍົມ ແຂວງຫລວງພະບາງ.
ຜົນໄດ້ຮັບ ຈາກຄາດໝາຍທີ 3: ສຳຫລັບ ວຽກງານການຜະລິດກະສິກຳ ແມ່ນ ສາມາດສ້າງ ສະມາຄົມຜູ້ຜະລິດ ກະສິກຳອິນຊີໄດ້ ແລະ ມີຄອບຄົວທີ່ໄດ້ຮັບການຢັ້ງຢືນໃຫ້ເປັນ ຄອບຄົວປູກພືດຜັກກະສິກຳອິນຊີ ໄດ້ 150 ຄອບຄົວ ສາມາດສະໜອງ ຜົນຜະລິດເຂົ້າສູ່ຕະຫລາດພາຍໃນແຂວງ ແລະ ເປີດຕະຫຼາດກະສິກຳອິນຊີ ອາທິດລະ 2 ຄັ້ງ(ວຽກງານດັ່ງກ່າວແມ່ນສືບຕໍ່ ແລະ ຮ່ວມມື ກັບຂະແໜງ ກະສິກຳ ແລະ ປ່າໄມ້ຂອງແຂວງ ທີ່ໄດ້ມີການສົ່ງເສີມມາກ່ອນໜ້ານີ້). ສ່ວນວຽກງານ ສົ່ງເສີມຫັດຖະກຳ ແມ່ນສາມາດ ສ້າງ ກາໝາຍ ສິນຄ້າຫັດຖະກຳຫລວງພະບາງ ສຳເລັດ ເພື່ອເຮັດໃຫ້ມີຄວາມແຕກຕ່າງລະຫວ່າງ ສິນຄ້າທີ່ຜະລິດພາຍໃນແຂວງ ດ້ວຍສີມືຂອງຊາວຊ່າງຫັດຖະກຳ ແລະ ສິນຄ້າທີ່ນຳເຂົ້າມາຈາກທ້ອງຖິ່ນອື່ນ. ປະຈຸບັນມີຫລາຍກ່ວາ 100 ຜູ້ປະກອບການໄດ້ນຳໃຊ້ກາໝາຍດັ່ງກ່າວໃນການ ໂຄສະນາ ແລະ ຈຳໜ່າຍສິນຄ້າ. ພ້ອມນີ້ກໍ່ໄດ້ສ້າງຄວາມເຂັ້ມແຂງໃຫ້ແກ່ສະມາຄົມ ຫັດຖະກຳຜ່ານຫລາຍຮູບແບບ ບໍ່ວ່າຈະເປັນການຍົກລະດັບບຸກຄະລາກອນທັງຢູ່ພາຍໃນ ແລະ ໄປຖອດຖອນບົດຮຽນຈາກຕ່າງປະເທດ, ການປະກອບທຶນຮອນໃນການຈັດງານ ຫັດຖະກຳແຂວງຫລວງພະບາງ, ການບູລະນະສູນຫັດຖະກຳບ້ານຜານົມ ການເຂົ້າຮ່ວມງານວາງສະແດງສິນຄ້າ ຢູ່ພາຍໃນ ແລະ ຕ່າງປະເທດ ຂອງສະມາຄົມ.
ຜົນໄດ້ຮັບຈາກຄາດໝາຍ ທີ 4: ໄດ້ມີການຈັດກອງປະຊຸມປຶກສາຫາລື ກ່ຽວກັບວຽກງານການພັດທະນາ ກະສິກຳອິນຊີຂຶ້ນ ທັງໝົດ 5 ຄັ້ງ ໂດຍທາງໂຄງການໄດ້ຮ່ວມມືກັບ ກົມປູກຝັງ ກະຊວງກະສິກຳ ແລະ ປ່າໄມ້ ໄດ້ເຊື້ອເຊີນເອົາຜູ້ປະກອບການ ແລະ ຊ່ຽວຊານ ກ່ຽວກັບກະສິກຳອິນຊີ ມາແລກປ່ຽນບົດຮຽນ ແລະ ກຳໜົດທິດທາງໃນການພັດທະນາໃນຕໍ່ໜ້າ.
ຜົນໄດ້ຮັບຈາກຄາດໝາຍ ທີ 5: ສູນການຜະລິດສະອາດ ໄດ້ໃຫ້ການຝຶກອົບຮົມໃຫ້ແກ່ໂຮງແຮມ ແລະ ຮ້ານອາຫານຫລາຍຄັ້ງ ເພື່ອໃຫ້ເຂົ້າໃຈເຖິງຜົນກະທົບດ້ານສິ່ງແວດລ້ອມ ຈາກການດຳເນີນທຸລະກິດໃນດ້ານດັ່ງກ່າວ ຜ່ານການຈັດຕັ້ງປະຕິບັດຕົວຈິງ ຮ່ວມກັບທຸລະກິດ 10 ຫົວໜ່ວຍ ໄດ້ພັດທະນາວິທີການດຳເນີນງານ ສາມາດຫລຸດການຊົມໃຊ້ນ້ຳ ແລະ ໄຟຟ້າ ຂອງຜູ້ມາໃຊ້ບໍລິການໃນໂຮງແຮມ ແລະ ຮ້ານອາຫານ ໄດ້ເຖິງ 50 ເປີເຊັນ ຂອງມູນຄ່າ ກ່ອນການປັບປຸງ.
ການຖອດຖອນບົດຮຽນຈາກການຈັດຕັ້ງໂຄງການ
ດ້ານດີ:
- ຖືກຕ້ອງຕາມທິດທາງຂອງການພັດທະນາ ເສດຖະກິດ-ສັງຄົມ ຂອງສປປ ລາວ ເວົ້າລວມ ເວົ້າສະເພາະ ກໍ່ແມ່ນຂອງແຂວງ ຫຼວງພະບາງ.
- ການນຳທັງສູນກາງ ແລະ ແຂວງ ໃຫ້ຄວາມສຳຄັນ ຊີ້ນຳນຳພາຢ່າງໄກ້ຊິດ ຫລາຍຂະແໜງການໃຫ້ການຮ່ວມມື
- ມີງົບປະມານຮອງຮັບການຈັດຕັ້ງກິດຈະກຳທີ່ພຽງພໍຈາກປະເທດຜູ້ໃຫ້ທຶນ
- ມີ 4 ອົງການຈັດຕັ້ງສາກົນທີ່ມີຄວາມຊຳນານສະເພາະທາງທີ່ຕ່າງກັນ ໃຫ້ການສຳໜັບສະໜູນ ດ້ານເຕັກນິກໃຫ້ໂຄງການ ອັນດຽວ ແຕ່ສາມາດພັດທະນາໄດ້ຫລາຍຂົງເຂດໄປພ້ອມໆກັນ
ສິ່ງທ້າທາຍ:
- ໂຄງການດັ່ງກ່າວເປັນຮູບແບບການຈັດຕັ້ງປະຕິບັດທິ່ຕິດພັນໄປກັບຫລາຍຂົງເຂດໃນເວລາດຽວກັນ ແລະ ໄດ້ຕິດພັນກັບຫລາຍຂະແໜງການ ສ້າງຄວາມສັບສົນໃຫ້ແກ່ຄູ່ຮ່ວມພັດທະນາພາຍໃນ ບາງຄັ້ງເກີດຄວາມເຂົ້າໃນຜິດວ່າໄປກ້າວກ່າຍວຽກງານຂອງຂະແໜງການອື່ນ
- ການຈັດຕັ້ງປະຕິບັດໂຄງການແມ່ນຕ້ອງການ ການຮ່ວມມືຈາກຂະແໜງການອື່ນເປັນສຳຄັນ ເພື່ອຮ່ວມຈັດຕັ້ງປະຕິບັດ ແຕ່ງົບປະມານທີ່ແບ່ງໃຫ້ຂະແໜງການອື່ນແມ່ນມີຈຳກັດສ່ວນຫລວງຫລາຍແມ່ນຢູ່ນຳ ອົງການຈັດຂອງສາກົນ ເຮັດໃຫ້ການປະກອບສ່ວນຂອງຫລາຍຂະແໜງການແມ່ນເຮັດວຽກຕາມພາລະບົດບາດ ຊຶ່ງການປະຕິບັດຕົວຈິງແມ່ນມີຄວາມລຳບາກ
- ການຕິດຕາມ ສັງລວມເອົາໝາກຜົນ ຂອງໂຄງການກໍ່ຫຍຸ້ງຍາກເນື່ອງຈາກ ຜູ້ສັງລວມແມ່ນບໍ່ສາມາດເຂົ້າໃຈວຽກງານຂອງຂົງເຂດອື່ນໄດ້ດີ
- ການລິເລີ່ມໂຄງການຕອນຕົ້ນ ແມ່ນມີຄວາມຊັກຊ້າ ເພາະເກີດຄວາມສັບສົນ ໃນກົນໄກການເຮັດວຽກຂອງ 4 ອົງການຈັດຕັ້ງສາກົນ ແລະ ກົນໄກການເຮັດວຽກພາຍໃນ
- ບົດຮຽນທີ່ລ້ຳຄ່າຈາກສາກົນ ບາງບົດຮຽນ ແມ່ນບໍ່ແທດເໝາະກັບ ຜູ້ຮັບຢູ່ໃນລະດັບ ທ້ອງຖິ່ນ ລະດັບຄວາມຮູ້ ຄວາມເຂົ້າໃຈຜູ້ໃຫ້ ກັບຜູ້ຮັບ ແມ່ນມີຄວາມແຕກໂຕນກັນເກີນໄປ
- ງົບປະມານສ່ວນຫລາຍ ແມ່ນບໍລິຫານໂດຍ ອົງການຈັດຕັ້ງສາກົນ ໂດຍອົງການດັ່ງກ່າວກໍ່ໃຊ້ເຂົ້າໃນວຽກງານ ຈັດຈ້າງ ຊ່ຽວຊານຈາກ ສາກົນເຂົ້າມາເຮັດວຽກ ຫລາຍກ່ວາ ການນຳເງິນເຂົ້າມາອັດສີດເຂົ້າໃນການ ຈັດຕັ້ງປະຕິບັດກິດຈະກຳຕົວຈິງ
- ການສ້າງຄວາມເຂັ້ມແຂງ ໃຫ້ແກ່ຄູ່ຮ່ວມພັດທະນາພາຍໃນ ໂດຍສະເພາະ ສະມາຄົມທຸລະກິດ ແມ່ນມີຄວາມຫຍຸ້ງຍາກຫລາຍ ການເຮັດວຽກຮ່ວມກັນເປັນກຸ່ມ ໂດຍມີແບບແຜນ ແລະ ການມີສ່ວນຮ່ວມແບບ ສະໝັກໃຈ ແມ່ນຖືເປັນບັນຫາໄຫມ່ ໂດຍຍັງຕ້ອງໄດ້ຮັບການແນະນຳ ແລະ ຕິດຕາມຢ່າງໄກ້ຊິດ
- ວຽກງານສ່ວນຫລາຍ ແມ່ນໂຄງການເປັນຜູ້ຜັກດັນຫລາຍກ່ວາ ແທນທີ່ຈະແມ່ນຜູ້ຮັບ ຄວນເປັນເຈົ້າການນຳໃນການດຳເນີນກິດຈະການຂອງຕົນເປັນຫລັກ ແລະ ໂຄງການເຂົ້າມາຊ່ວຍຊຸກຍູ້ສະໜັບສະໜູນ • ບາງຄຳເຫັນທີ່ຂໍຝາກໄວ້ ກັບແຂວງ ແລະ ຜູ້ໃຫ້ການສະຫນັບ ສະຫນູນ
- ກົມຂອງພວກຂ້າພະເຈົ້າ ຈະສືບຕໍ່ຂໍການຊີ້ນຳຈາກ ກະຊວງ ແລະ ບັນດາຂະແໜງການກ່ຽວຂ້ອງຢູ່ຂັ້ນສູນກາງ ເພື່ອຊ່ວຍຊຸກຍູ້ໃຫ້ໝາກຜົນຂອງໂຄງການ ທີ່ໄດ້ສ້າງໄວ້ຕະຫລອດລະຍະ 6 ປີ ໃຫ້ສາມາດດຳເນີນ ໄປໄດ້ຕໍ່ ແລະ ສືບຕໍ່ສ້າງຜົນປະໂຫຍດໃຫ້ແກ່ປະຊາຊົນພາຍໃນແຂວງ ແລະ ກໍ່ຈະໄດ້ນຳເອົາບົດຮຽນດັ່ງກ່າວນີ້ ໄປຜັນຂະຫຍາຍໃນແຂວງອື່ນ ທີ່ມີທ່າແຮງໄກ້ຄຽງກັນນີ້ ພ້ອມນີ້ກໍ່ຈະປະສານຫາຜູ້ໃຫ້ທຶນ ເພື່ອຊອກຫາທຸກຮູບແບບຂອງການຊ່ວຍເຫຼືອ ເຂົ້າມາຊ່ວຍແຂວງເພີ່ມຕື່ມ ຖ້າເປັນໄປໄດ້
- ຂໍໃຫ້ການນຳຂອງແຂວງ ແລະ ຂະແໜງການກ່ຽວຂ້ອງ ໄດ້ນຳເອົາໝາຍຜົນຂອງໂຄງການ ເຂົ້າເປັນວຽກງານໜຶ່ງຂອງແຂວງ ເພື່ອຊ່ວຍພາກທຸລະກິດ ແລະ ປະຊາຊົນ ໃຫ້ໄດ້ຜົນປະໂຫຍດຈາກ ອຸດສາຫະກຳ ການທ່ອງທ່ຽວ ໄດ້ຫລາຍເທົ່າທີ່ຈະຫລາຍໄດ້
- ສະໜີຕໍ່ ຜູ້ໃຫ້ການສະຫນັບສະຫນູນ ບໍ່ວ່າຈະເປັນ ທາງດ້ານເງິນທຶນ ແລະ ເຕັກນິກ ໄດ້ສືບຕໍ່ຊ່ວຍຂະຫຍາຍໝາກຜົນທີ່ໄດ້ສ້າງໄວ້ ໃຫ້ປະສົບຜົນສຳເລັດຫຼາຍກ່ວາເກົ່າ ແລະ ສາມາດເອົາບົດຮຽນທີ່ໄດ້ນີ້ ໄປເຜີຍແຜ່ ແລະ ສ້າງເປັນໂຄງການໃນສະຖານທີ່ແຫ່ງໄຫມ່.
ທຸກໆສິ່ງ ທຸກໆຢ່າງ ຈະສຳເລັດໄດ້ ຫຼື ຈະມີຄວາມຍືນຍົງໄດ້ ກໍ່ແມ່ນຂຶ້ນຢູ່ກັບຄົນ. ເຖິງໂຄງການຈະມີທິດທາງ ນະໂຍບາຍ ເຕັກນິກ ແລະ ງົບປະມານ ທີ່ດີ ແຕ່ບຸກຄະລາກອນຫາກຂາດຄວາມເຂົ້າໃຈ ບໍ່ເອົາໃຈໃສ່ໃນລະດັບທີ່ຄວນ ແລະ ຂາດລະບຽບວິໃນ ກໍ່ຈະເປັນໂຄງການທີ່ບໍ່ມີປະສິດທິຜົນ ແລະ ບໍ່ສາມາດດຳເນີນຕໍ່ໄດ້. ດັ່ງນັ້ນ, ຈຶ່ງຂໍຝາກໂຄງການດັ່ງກ່າວນີ້ໄວ້ກັບບັນດາທ່ານ ເພື່ອຊ່ວຍສືບຕໍ່ຕິດຕາມ ໃຫ້ທິດຊີ້ນຳ ຊຸກຍູ້ສົ່ງເສີມ ໃຫ້ສາມາດສືບຕໍ່ຮັບໃຊ້ ສ້າງຜົນປະໂຫຍດສູງສົດໃຫ້ແຂວງ ແລະ ກ້າວໄປສູ່ຄວາມຍືນຍົງໄດ້. ບົດຮຽນອັນລ້ຳຄ່ານີ້ ຈະຖືກນຳໄປໃຊ້ໃນອີກຫລາຍຂົງເຂດໃນທົ່ວປະເທດ ກໍ່ຄື ທົ່ວໂລກ ອີກ. ອາດຈະໄດ້ໃຊ້ຊື່ວ່າ ເປັນ Luang Pra Bang Model ກໍ່ເປັນໄດ້

ຈາກແຫຼ່ງຂ່າວ: ເວັບໄຊ ກົມສົ່ງເສີມ ແລະ ພັດທະນາສິນຄ້າ

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​