ຫົວ​ຂໍ້ : ພິທີເປີດປ້າຍກາໝາຍ

ເຜີຍ​ແຜ່​ໂດຍ​: algi@admin ເວ​ລາ: 27/02/2020 22:43:26 ຈຳ​ນວນ​ຜູ້​ເຂົ້າ​ຢ້ຽມ​ຊົມ 183 ຄັ້ງ

   ໃນວັນທີ 16 ພຶຶດສະພາ 2016 ເວລາ 09:30 ກົມສົ່ງເສີມ ແລະ ພັດທະນາ ສິນຄ້າ, ກະຊວງອຸດສາຫະກໍາ ແລະ ການຄ້າ ຮ່ວມກັບຫ້ອງການ ອຸດສາຫະກໍາ ແລະ ການຄ້າ ເມືອງໄຊເສດຖາ ແລະ ອໍານາດປົກຄອງ ເມືອງໄຊເສດຖາ, ນະ ຄອນຫຼວງວຽງຈັນ ໄດ້ຈັດພິທີເປີດກາໝາຍສິນຄ້າ "ໜຶ່ງເມືອງໜຶ່ງຜະລິດຕະພັນ" ແຫ່ງຊາດ ODOP ໃຫ້ແກ່: ວິສາຫະກິດສ່ວນບຸກຄົນ ຫັດຖະກໍາຕໍ່າຫູກ ຕໍ່າລາຍລາວ ບ້ານ ສີສັງວອນ, ເມືອງ ໄຊເສດຖາ,ນະຄອນຫຼວງວຽງຈັນ. ພິທີດັ່ງ ກ່າວໄດ້ຈັດຂຶ້ນຢູ່ເຮືອນຂອງຜວິສາຫະກິດເອງ ທີ່ບ້ານ ສີສັງວອນ, ເມືອງ ໄຊເສດຖາ, ນະຄອນຫຼວງວຽງຈັນ ໃຫ້ກຽດເປັນປະທານ
   ໃນພິທີດັ່ງກ່າວໂດຍ: ທ່ານ ສົມຫວັງ ນິນທະວົງ ຫົວໜ້າກົມສົ່ງເສີມ ແລະ ພັດທະນາສິນຄ້າ, ທ່ານ ທະວີໄຊ ເໝົາຊົມ ພູ ຮອງເຈົ້າເມືອງໆໄຊເສດຖາ ແລະ ທ່ານ ວຽງຄໍາ ຫຼວງອໍານາດ ຫົວໜ້າຫ້ອງການ ພັດທະນາຊົນນະບົດ ແລະ ລຶບລ້າງຄວາມທຸກຍາກ ເມືອງ ໄຊເສດຖາ ແລະ ຍັງມີຫົວ ໜ້າສະມາຄົມຫັດຖະກໍາ, ຕາງໜ້າຈາກຫ້ອງຕ່າງໆ, ນາຍບ້ານ, ພະນັກງານລັດຖະກອນ ແລະ ແຂກທີ່ຖືກເຊີນ ຈໍານວນໜຶ່ງ ເຂົ້າຮ່ວມເປັນສັກຂີພະຍານໃນຄັ້ງນີ້ດ້ວຍ.
   ທ່ານ ທະວີໄຊ ເໝົາຊົມພູ ຮອງເຈົ້າເມືອງໆໄຊເສດຖາ ກ່າວວ່າ: ເພື່ອປະຕິບັດຕາມທິດຊີ້ນໍາຂອງທ່ານເຈົ້າຄອງນະຄອນຫຼວງ ວຽງຈັນ, ວ່າດ້ວຍສ້າງໃຫ້ໄດ້ໜຶ່ງບ້ານໜຶ່ງຜະລິດຕະພັນ ແລະ ໜຶ່ງເມືອງບໍ່ໃຫ້ຫຼຸດ 05 ຜະລິດຕະພັນ, ຄະນະນໍາຂອງເມືອງ ກໍ່ຖືເປັນບັນຫາ ໜຶ່ງທີ່ສໍາຄັນໃນການຈັດຕັ້ງຜັນຂະຫຍາຍຕໍ່ທິດຊີ້ນໍາດັ່ງກ່າວ, ຄະນະນໍາຂອງເມືອງໄດ້ມອບໝາຍໃຫ້ຫ້ອງການ ອຸດສາຫະກໍາ ແລະ ການຄ້າ ເມືອງເປັນເສນາທິການ ແລະ ເປັນໃຈກາງຂອງການຊຸກຍູ້ສົ່ງເສີມໃຫ້ໄດ້ 05 ຜະລິດຕະພັນຂຶ້ນໄປ, ສົ່ງເສີມໃຫ້ໄດ້ໜຶ່ງບ້ານໜຶ່ງ ຜະລິດຕະພັນ ວຽກງານດັ່ງກ່າວນີ້ໄດ້ການເປັນອີກວຽກງານໜຶ່ງຕົ້ນຕໍ ທາງເມືອງໄຊເສດຖາພວກເຮົາ ໄດ້ໃຫ້ຄວາມສໍາຄັນຕະຫຼອດມາ ເພື່ອສົ່ງເສີມໃຫ້ປະຊາຊົນສາມາດນໍາໃຊ້ຫົວຄິດປະດິດສ້າງ ແລະ ພູມປັນຍາຂອງຕົນ ເຂົ້າໃນ ການຜະລິດ ສາມາດສ້າງລາຍຮັບໃຫ້ ແກ່ຕົນເອງ, ອັນເປັນການແກ້ໄຂບັນຫາເສດຖະກິດໃນລະດັບຄອມຄົວ ແລະ ວຽກງານນີ້ ຍັງເປັນການກຽມຄວາມພ້ອມໃຫ້ປະຊາຊົນ ທີ່ນອນຢູ່ໃນລະບົບການຜະລິດຂະໜາດນ້ອຍເຂົ້າສູ່ປະຊາຄົມເສດຖະ ກິດອາຊຽນກໍ່ຄື AEC ນັ້ນເອງ.
   ແຜນການຕໍ່ໜ້າ: ທາງເມືອງຂອງພວກເຮົາກໍ່ຈະໄດ້ສູ້ຊົນ, ຊຸກຍູ້ສົ່ງເສີມເພື່ອສ້າງຄອບຄົວຕົວແບບການຜະລິດໃຫ້ກາຍ ເປັນສິນຄ້າ ໂອດອບ, ໃຫ້ໄດ້ຫຼາຍຕາມທິດຊີ້ນໍາຂອງນະຄອນຫຼວງວຽງຈັນວາງອອກ, ດັ່ງນັ້ນພວກເຮົາຈິ່ງມີແຜນການສົ່ງ ເສີມຫົວໜ້າທຸລະກິດ ໃນຕໍ່ໜ້າເຊັ່ນ: 1. ກົງທອງຫັດຖະກໍາ ຂອງ ທ່ານ ກົງທອງ, ບ້ານ ໂພນສະອາດ, 2. ກຸ່ມຜະລິດ ແລະ ສົ່ງເສີມຖົວອິນຊີລາວ ຂອງທ່ານ ນາງ ຄໍາເສົາ, ບ້ານ ນາຄວາຍກາງ ແລະ 3. ຜະລິດຕະພັນນໍ້າໝາກໄມ້ປອດສານພິດ ນາງ ມ໋ອງ ບ້ານ ໂພນທັນ.
   ທ່ານ ສົມຫວັງ ນິນທະວົງ ຫົວໜ້າກົມສົ່ງເສີມ ແລະ ພັດທະນາສິນຄ້າ ກ່າວວ່າ: ເພື່ອຈັດຕັ້ງປະຕິບັດແນວທາງນະໂຍ ບາຍຂອງພັກ-ລັດຖະບານ ທີ່ໄດ້ນໍາເອົາການຜະລິດເປັນສິນຄ້າແບບ "ໜຶ່ງເມືອງໜຶ່ງຜະລິດຕະພັນ" ແຫ່ງຊາດ ແມ່ນອົງປະກອບ ໜຶ່ງ, ເປັນກິດຈະກໍາໜຶ່ງ ແລະ ເປັນແຜນງານໜຶ່ງເຂົ້າໃນໂຄງການຈັດຕັ້ງປະຕິບັດ ການລຶບລ້າງຄວາມທຸກຍາກ ໃນເຂດຕົວເມືອງ ແລະ ຊົນນະບົດ ທີ່ຕິດພັນກັບວຽກງານ 3 ສ້າງຕາມມະຕິ 03 ຂອງກົມການເມືອງສູນການພັກ ໂດຍນໍາໃຊ້ວຽກງານ ໂອດອບ ນີ້ເປັນເຄື່ອງໝາຍ ສັນຍາລັກ ທີ່ສາມາດສ້າງມູນຄ່າເພີ່ມ, ສ້າງໃຫ້ສິນຄ້າທີ່ເປັນເອກະລັກ ມີຄວາມໂດດເດັ່ນ ຂອງພູມປັນຍາທີ່ ໄດ້ສືບທອດມູນເຊື້ອ ຈາກການຜະລິດຄົນຫຼຸ້ນເກົ່າມາສູ່ຫຼຸ້ນໃໝ່ ພ້ອມທັງ, ແນະນໍາຫົວໜ່ວຍທຸລະກິດໃຫມ່ ແລະ ເກົ່າໃຫ້ມີ ການປົກປ້ອງຊັບສິນທາງປັນຍາ (ລິຂະສິດຂອງສິນຄ້າ) ຂອງຕົນເອງ ໂດຍສະເໜີຕາມຂັ້ນຕອນຂອງ ກະຊວງວິທະຍາສາດເຕັກ ໂນໂລຊີ, ໃນປະຈຸບັດນີ້ກົມສົ່ງເສີມ ແລະ ພັດທະນາສິນຄ້າ ຮ່ວມກັບອົງການຈັດຕັ້ງຕ່າງໆ ສາມາດອອກໃບຢັ້ງຢືນ ແລະ ຕິດກາໝາຍສິນຄ້າ "ໜຶ່ງເມືອງໜຶ່ງຜະລິດຕະພັນ" ແຫ່ງຊາດ (ODOP) ໄດ້ແລ້ວ 103 ຫົວໜ່ວຍຜູ້ຜະລິດ ມີຫຼາຍກວ່າ 377 ຜະລິດຕະພັນ ( 99 ບ້ານ 55 ເມືອງ ແລະ 14 ແຂວງ ) ໃນນັ້ນນະຄອນຫຼວງມີ 34 ຫົວໜ່ວຍ, 164 ກວ່າຜະລິດຕະພັນ.
   ແຜນການໃນຕໍ່ໜ້າ: ຈະໄດ້ສືບຕໍ່ຊຸກຍູ້ສົ່ງເສີມ 04 ແຂວງທີ່ຍັງບໍ່ສາມາດປະກາດການນໍາໃຊ້ກາໝາຍ ໂອດອບແຫ່ງຊາດຄື: ແຂວງຜົ້ງສາລີ, ໄຊສົມບູນ, ເຊກອງ ແລະ ອັດຕະປື, ສືບຕໍ່ແກ້ໄຂບັນຫາທີ່ຄົງຄ້າງຂອງເມືອງປາກງື່ມ ແລະ ຈັດກອງປະຊຸມ ສະຫຼຸບ ແລະ ຖອດຖອນບົດຮຽນວຽກງານ ໂອດອບ ທົ່ວປະເທດ ຄັ້ງທີ 1 ໃນທ້າຍປີ 2016. ທ່ານ ຍັງໄດ້ຮຽກຮ້ອງມາ ຍັງກຸ່ມຜູ້ຜະລິດເປັນສິນຄ້າ ທີ່ໄດ້ຮັບກາໝາຍ ODOP ໃນຊຸດນີ້ ຫຼື ຊຸດກ່ອນທີຕິດມາແລ້ວນັ້ນ ໃຫ້ສືບຕໍ່ຕັ້ງໜ້າບຸກບືນປະດິດ ຄິດແຕ່ງ ຜະລິດຕະພັນສິນຄ້າ ທີ່ຫຼາກຫຼາຍຂຶ້ນກວ່າເກົ່າ ແລະ ໃຫ້ໄດ້ຕິດກາໝາຍສິນຄ້າ ODOP 1 ດາວຈົນເຖິງ 5 ດາວ ໃນ ອານາຄົດ.
   ສົມຫວັງ ນິນທະວົງ ຫົວໜ້າກົມສົ່ງເສີມ ແລະ ພັດທະນາສິນຄ້າ ແລະ ທ່ານ ທະວີໄຊ ເໝົາຊົມພູ ຮອງເຈົ້າເມືອງໆ ໄຊເສດຖາ ຮ່ວມກັນເປີດພິທີຕິດກາໝາຍ "ໜຶ່ງເມືອງໜຶ່ງຜະລິດຕະພັນ" ແຫ່ງຊາດ (ODOP) ໃຫ້ແກ່: ວິສາຫະກິດ ສ່ວນບຸກຄົນ ຫັດຖະກໍາຕໍ່າຫູກຕໍ່າລາຍລາວ.

ແຫຼ່ງຂ່າວຈາກ: ເວັບໄຊ ກົມສົ່ງເສີມ ແລະ ພັດທະນາສິນຄ້າ

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​