ຫົວ​ຂໍ້ : ພິທີລົງນາມບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມື ດ້ານວິຊາການ ແລະ ການນໍາໃຊ້ຫໍສະໝຸດ ເອເລັກໂຕຼນິກ

ເຜີຍ​ແຜ່​ໂດຍ​: algi@admin ເວ​ລາ: 27/02/2020 22:29:57 ຈຳ​ນວນ​ຜູ້​ເຂົ້າ​ຢ້ຽມ​ຊົມ 194 ຄັ້ງ

   ໃນວັນທີ 4 ພະຈິກ 2016 ທີ່ຫ້ອງປະຊຸມຊັ້ນ 4 ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດພິທີ ລົງນາມບົດບັນທຶກຄວາມເຂົ້າໃຈ (MOU) ວ່າດ້ວຍການຮ່ວມມືດ້ານວິຊາການ ແລະ ການນຳໃຊ້ຫໍສະໝຸດ ເອເລັກໂຕຼນິກ ລະຫວ່າງ ກວຕ, ສປປ ລາວ ແລະ ມະຫາວິທະຍາໄລຄົ້ນຄວ້າແຫ່ງລັດໂຕມສ, ສະຫະພັນຣັດເຊຍ.
   ໂອກາດນີ້, ທັງສອງຝ່າຍ ໄດ້ຮ່ວມລົງນາມໃນສອງເອກະສານສຳຄັນຄື: ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານວິຊາການ ແລະ ຂໍ້ຕົກລົງວ່າດ້ວຍການນຳໃຊ້ຫໍສະໝຸດ ເອເລັກໂຕຼນິກ. ການຮ່ວມລົງນາມໃນເອກະສານຄັ້ງນີ້ ເປັນການເສີມຂະຫຍາຍການຮ່ວມມືສອງຝ່າຍທີ່ພົວພັນໃນຂົງເຂດການຮ່ວມມື ດ້ານວຽກງານເຕັກໂນໂລຊີຄອມພິວເຕີ ແລະ ເອເລັກໂຕຼນິກ ລະຫວ່າງ ກວຕ ແລະ ມະຫາວິທະຍາໄລຄົ້ນຄວ້າແຫ່ງລັດໂຕມສ.
   ການເຊັນບົດບັນທຶກຄັ້ງນີ້ ຈະເປັນໂອກາດອັນດີສຳລັບການແລກປ່ຽນບົດຮຽນທາງດ້ານວິຊາການ, ຖອນຖອດບົດຮຽນນຳສາກົນ, ເປັນການຍາດແຍ່ງເອົາການຊ່ວຍເຫຼືອໃນດ້ານຕ່າງໆນຳຝ່າຍ ສະຫະພັນຣັດເຊຍ ພ້ອມທັງເປີດໂອກາດໃຫ້ພະນັກງານຂອງ ກວຕ ໄດ້ຮັບການຍົກລະດັບ ແລະ ແລກປ່ຽນປະສົບການ ກັບນັກວິຊາການ ແລະ ອາຈານຂອງມະຫາວິທະຍາໄລດັ່ງກ່າວ.
   ການລົງນາມເຊັນບົດບັນທຶກຄວາມເຂົ້າໃຈຄັ້ງນີ້, ຕາງໜ້າຝ່າຍລາວ ມີສອງທ່ານຄື: ທ່ານ ພິມພາ ອຸດທະຈັກ, ຮັກສາການ ຫົວໜ້າກົມແຜນການ ແລະ ຮ່ວມມື, ກວຕ ລົງນາມໃນເອກະສານບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານວິຊາການ ແລະ ທ່ານ ຄຳແຜ່ວ ຫອມລັດສະໝີ, ຮອງຫົວໜ້າກົມເຕັກໂນໂລຊີຂໍ້ມູນຂ່າວສານ, ກວຕ ລົງນາມໃນເອກະສານວ່າດ້ວຍການນຳໃຊ້ຫໍສະໝຸດ ເອເລັກໂຕຼນິກ ແລະ ຕາງໜ້າຝ່າຍ ສະຫະພັນຣັດເຊຍ ຮ່ວມລົງນາມເອກະສານ 2 ສະບັບ ໂດຍ ທ່ານ Artyom Rykun, ຮອງອະທິການບໍດີ ການພົວພັນຕ່າງປະເທດ, ມະຫາວິທະຍາໄລຄົ້ນຄວ້າແຫ່ງລັດໂຕມສ.
   ພິທີດັ່ງກ່າວ ໄດ້ຮັບກຽດການເຂົ້າຮ່ວມເປັນສັກຂີພິຍານ ຂອງ ທ່ານ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີ ກວຕ, ທ່ານ ຮອງລັດຖະມົນຕີ ກວຕ, ທ່ານ ອະທິການບໍດີມະຫາວິທະຍາໄລຄົ້ນຄວ້າແຫ່ງລັດໂຕມສ, ທ່ານ ເອກອັກຄະລັດຖະທູດ ຣັດເຊຍ ປະຈຳລາວ, ບັນດາທ່ານ ຫົວໜ້າຫ້ອງການ, ກົມ, ສະຖາບັນ ແລະ ພະນັກງານທີ່ກ່ຽວຂ້ອງທັງສອງຝ່າຍ.


ແຫຼ່ງຂ່າວຈາກ: ເວັບໄຊກະຊວງວຶທະຍາສາດ

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​