ຫົວ​ຂໍ້ : ອປສ ເຂົ້າຮ່ວມກອງປະຊຸມ ສະມາຄົມປະກັນສັງຄົມອາຊ່ຽນຄັ້ງທີ 31 ທີປະເທດມາເລເຊຍ

ເຜີຍ​ແຜ່​ໂດຍ​: algi@admin ເວ​ລາ: 27/02/2020 22:06:34 ຈຳ​ນວນ​ຜູ້​ເຂົ້າ​ຢ້ຽມ​ຊົມ 432 ຄັ້ງ

  ໂດຍປະຕິບັດຕາມວາລະຂອງ ກອງປະຊຸມສະພາບໍລິຫານ ສະມາຄົມປະກັນສັງຄົມ ອາຊ່ຽນ (ອາຊາ), ເຊິ່ງຖືເປັນພັນທະຂອງບັນດາປະເທດສະມາຊິກ ທີ່ຕ້ອງຜັດປ່ຽນ ກັນເປັນເຈົ້າພາບໂດຍການຈັດລຽງຕາມຕົວອັກສອນ ແລະ ໃນປີຜ່ານມາ ສປປ ລາວ (ອົງການປະກັນສັງຄົມ ຫຼື ອປສ) ໄດ້ເປັນເຈົ້າພາບໃນການຈັດກອງປະຊຸມສະພາບໍລິຫານ ສະມາຄົມປະກັນສັງຄົມອາຊ່ຽນຄັ້ງທີ 30 ທີ່ວຽງຈັນ ແລະ ໄດ້ຮັບກຽດເປັນປະທານ ສະພາດັ່ງກ່າວ. ສຳລັບກອງປະຊຸມຄັ້ງທີ 31 ນີ້ ແມ່ນປະເທດມາເລເຊຍເປັນເຈົ້າພາບໂດຍມີກິດຈະກຳຕ່າງໆ ດັ່ງລຸ່ມນີ້:
ໃນວັນທີ 8/9/2014 ໄດ້ມີກອງປະຊຸມສຳມະນາເປີດກວ້າງທາງດ້ານວິຊາການ, ເຊິ່ງເປັນ ກອງປະຊຸມປິ່ນອ້ອມໃຫ້ແກ່ກອງປະຊຸມສະພາບໍລິ ຫານສະມາຄົມປະກັນສັງຄົມອາຊ່ຽນ, ໂດຍມີນັກວິທະຍາກອນລະດັບຊ່ຽວຊານມີປະສົບການທັງພາຍໃນ ແລະ ຕ່າງປະເທດໃນຫົວຂໍ້ "ການ ຮັບຊາບໄພຂົ່ມຂູ່ ແລະ ກາລະໂອກາດ ທີ່ມາພ້ອມກັບການປ່ຽນແປງທາງປະຊາກອນ" ຈາກ 5 ທ່ານຂຶ້ນນຳສະເໜີບົດຮຽນ ແລະ ແລກປ່ຽນ ປະສົບການຄື:
1. ການປ່ຽນແປງທາງດ້ານປະຊາກອນ ແລະ ອາຍຸຂອງຄົນໃນສັງຄົມ (Demographic Changes and Ageing Society);
2. ຄວາມເຂົ້າໃຈກ່ຽວກັບຜົນກະທົບດ້ານປະຊາກອນຕໍ່ກັບປະເທດຊາດ (Understanding How Demographics Affect the Nation);
3. ການຈະເລີນເຕີບໂຕຂອງປະຊາກອນໃນເມື່ອກ່ອນ ແລະ ປັດຈຸບັນ (Leveraging Baby Boomers and Gen X in a Gen Y Environment);
4. ຜົນກະທົບຂອງການປ່ຽນແປງທາງດ້ານປະຊາກອນ ແລະ ການກຳນົດການບໍລິການທີ່ແຕກຕ່າງກັນໃນສັງຄົມ (The Impact of Demographic Change and Generational Differences on Public Services);
5. ການປ່ຽນແປງດ້ານປະຊາກອນ ແລະ ການກຳນົດການບໍລິຫານທີ່ແຕກຕ່າງກັນໃນຂະແໜງການສື່ສານມສວນຊົນ (Demographic Changes and Managing Gennerational Differences (Mass Media Industry);
ໃນຕອນເຊົ້າຂອງວັນທີ 9/9/2014 ກໍໄດ້ມີການສຳມານາວິຊາການ ກ່ຽວກັບປະສົບການໃນການຈັດຕັ້ງປະຕິບັດວຽກງານປະກັນສັງຄົມຂອງບັນ ດານັກວິທະຍາກອນ ຈາກບັນດາປະເທດສະມາຊິກອາຊາ, ເຊິ່ງໄດ້ແບ່ງອອກເປັນກຸ່ມຄື:
   ກຸ່ມທີ 1 ເວົ້າກ່ຽວກັບ "ການປະກັນສັງຄົມ ຫຼື Social Security" ນຳສະເໜີໂດຍນັກວິທະຍາກອນຈາກປະເທດມາເລເຊຍ, ສິງກະໂປ ແລະ ໄທ.
   ກຸ່ມທີ 2 ແມ່ນເວົ້າກ່ຽວກັບ "ການປະກັນສຸຂະພາບ ຫຼື Healthcare" ແມ່ນນຳສະເໜີໂດຍນັກວິທະຍາກອນຈາກປະເທດຟິລິປິ່ນ, ກຳປູເຈຍ ແລະ ຫວຽດນາມ.
   ສ່ວນໃນຕອນບ່າຍຂອງວັນດຽວກັນໄດ້ມີກອງປະຊຸມສະພາບໍລິຫານ ສະມາຄົມປະກັນສັງຄົມອາຊ່ຽນ (ອາຊາ) ຫຼື Asean Social Security Association (ASSA's board meeting) ຄັ້ງທີ 31, ເຊິ່ງໄດ້ຈັດຂຶ້ນທີ່ໂຮງແຮມ Aloft, ເມືອງກົວລາລຳເປີ, ປະເທດມາເລເຊຍ. ໂດຍການ ເປັນປະທານຂອງ ທ່ານ ປະສົງ ວົງຄຳຈັນ ຜູ້ອຳນວຍການ ອົງການປະກັນສັງຄົມ (ອປສ), ປະທານກອງປະຊຸມສະພາບໍລິຫານ ສະມາຄົມປະກັນສັງຄົມ ອາຊ່ຽນ (ອາຊາ). ເຊິ່ງມີບັນດາປະເທດສະມາຊິກເຂົ້າຮ່ວມທັງໝົດ 9 ປະເທດ ຄື: ບຣູໄນ, ກຳປູເຈຍ, ອິນໂດເນເຊຍ, ລາວ, ມາເລເຊຍ, ຟິລິປິ່ນ, ສິງກະໂປ, ໄທ ແລະ ຫວຽດນາມ ແລະ ມີແຂກເຂົ້າຮ່ວມທັງໝົດ 65 ທ່ານ. ກອງປະຊຸມ ຄັ້ງນີ້ ຈັດໂດຍກອງທຶນທົດແທນຄ່າແຮງງານກຳມະກອນຂອງປະເທດມາເລເຊຍ (SOCSO) ແລະ ກອງທຶນສຳຮອງລ້ຽງຊີບຂອງປະເທດມາເລເຊຍ (EPF).
   ຈຸດປະສົງຂອງກອງປະຊຸມອາຊາແມ່ນເພື່ອແລກປ່ຽນບົດຮຽນ ແລະ ປຶກສາຫາລືວິທີການໃນການປັບປຸງລະບົບປະກັນສັງຄົມຂອງແຕ່ລະປະ ເທດໃຫ້ສອດຄ່ອງກັບສະພາບຄວາມເປັນຈິງຂອງພາກພື້ນ ແລະ ສາກົນເທື່ອລະກ້າວແນໃສ່ຮັບປະກັນໃຫ້ແກ່ການສ້າງເປັນປະຊາຄົມອາຊຽນ ໃນປີ 2015. ໃນກອງປະຊຸມຄັ້ງນີ້ຜູ້ແທນຈາກບັນດາປະເທດສະມາຊິກໄດ້ພ້ອມກັນທົບທວນຄືນ ແລະ ຮັບຮອງບາງເນື້ອໃນທີ່ໄດ້ປຶກສາຫລື ກັນໃນກອງປະຊຸມຄັ້ງທີ 30 ທີ່ລາວໄດ້ຮັບກຽດເປັນເຈົ້າພາບຈັດຂຶ້ນໃນເດືອນ 10/2013 ທີ່ຜ່ານມາ. ນອກນີ້, ກອງປະຊຸມຍັງໄດ້ຖອດຖອນບົດ ຮຽນຮ່ວມກັນກ່ຽວກັບການສ້າງຕັ້ງກອງທຶນປະກັນສັງຄົມໃຫ້ມີຄວາມເຂັ້ມແຂງຍືນຍົງ. ສຳລັບ ສປປ ລາວ, ກອງປະຊຸມຄັ້ງນີ້ແມ່ນມີຄວາມສຳຄັນ ຫຼາຍເພາະເປັນໂອກາດອັນດີທີ່ໄດ້ແລກປ່ຽນບົດຮຽນກັບບັນດາປະເທດສະມາຊິກອາຊາໃນຫົວຂໍ້: "ຜົນກະທົບຈາກການປ່ຽນແປງດ້ານປະຊາ ກອນ", "ການປະກັນສັງຄົມ" ແລະ "ການປະກັນສຸຂະພາບ" ຂອງບັນດານັກສຳມະນາກອນຈາກປະເທດສະມາຊິກດ້ວຍກັນ. ໃນໂອກາດນີ້ ທ່ານ ປະສົງ ວົງຄຳຈັນ ຜູ້ອຳນວຍການອົງການປະກັນສັງຄົມ (ອປສ), ປະທານອາຊາ ກໍໄດ້ມອບຕຳແໜ່ງປະທານໃຫ້ແກ່ ທ່ານ Datuk Shahril Ridza Ridzuan (ປະທານກອງທຶນສຳຮອງລ້ຽງຊີບກຳມະກອນຂອງປະເທດມາເລເຊຍ ຫຼື Employees Provident Fund Malaysia) ດຳລົງຕຳແໜ່ງຕໍ່ໄປຈົນຄົບວາລະໜຶ່ງປີ.
   ຈາກນັ້ນກໍໄດ້ມີກອງປະຊຸມກອງເລຂາຂອງອາຊາໂດຍການເປັນປະທານຂອງ ທ່ານ Tunku Alizakri Raja Muhammad Alias (ຮອງປະທານກອງທຶນສຳຮອງລ້ຽງຊີບກຳມະກອນຂອງປະເທດມາເລເຊຍ ຫຼື Employees Provident Fund Malaysia) ເຊິ່ງມີບັນດາກອງ ເລຂາຂອງປະເທດສະມາຊິກອາຊາເຂົ້າຮ່ວມ. ກອງເລຂາອາຊາມີໜ້າທີ່ໃນການເປັນເສນາທິການໃຫ້ແກ່ ປະທານອາຊາເພື່ອລາຍງານການ ເຄື່ອນໄຫວວຽກງານປະກັນສັງຄົມໃນປະເທດຕົນ ແລະ ປະສານງານກັບບັນດາປະທດສະມາຊິກ, ໃນກອງປະຊຸມໄດ້ປຶກສາຫາລືບັນດາໜ້າວຽກ ທີ່ສຳຄັນຂອງອາຊາເພື່ອຮ່ວມກັນຄົ້ນຄວ້າ ແລະ ແບ່ງໜ້າວຽກໃຫ້ແກ່ບັນດາປະເທດສະມາຊິກໃນການກະກຽມກອງປະຊຸມສະພາບໍລິຫານສະມາ ຄົມປະກັນສັງຄົມອາຊ່ຽນຄັ້ງທີ່ 32 ທີ່ປະເທດສິງກະໂປ, ເຊິ່ງຄາດວ່າຈະໄດ້ຈັດຂຶ້ນໃນລະຫວ່າງເດືອນພະຈິກ 2015. ກອງປະຊຸມໄດ້ຕົກລົງໃຫ້ ປະເທດລາວ, ໄທ, ສິງກະໂປ, ອິນໂດເນເຊຍ, ມາເລເຊຍ ແລະ ບຣູໄນ ເປັນຜູ້ກະກຽມເນື້ອໃນເພື່ອນຳສະເໜີບົດຮຽນທີ່ດີໃນການຈັດຕັ້ງວຽກ ງານປະກັນສັງຄົມໃນປະເທດຕົນ ໃຫ້ແກ່ບັນດາປະເທດສະມາຊິກໄດ້ຮັບຟັງ ແລະ ແລກປ່ຽນບົດຮຽ­ນຊຶ່ງກັນ ແລະ ກັນ.

ແຫຼ່ງຂ່າວຈາກ: ເວັບໄຊ ກະຊວງແຮງງານ ແລະ ສະຫວັດດີການສັງຄົມ

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​