ຫົວ​ຂໍ້ : ເຈົ້າໜ້າທີ່ອາວຸໂສ ຫາລືກະກຽມໃຫ້ແກ່ກອງປະຊຸມລັດຖະມົນຕີ ຕ່າງປະເທດອາຊຽນແບບວົງແຄບ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ ເວ​ລາ: 17/01/2020 09:17:04 ຈຳ​ນວນ​ຜູ້​ເຂົ້າ​ຢ້ຽມ​ຊົມ 245 ຄັ້ງ

     ໃນ​ວັນ​ທີ 16 ມັງກອນ ນີ້ ທີ່ຍ່າ​ຈ່າງ ສສ ຫວຽດນາມ, ທ່ານ ທອງ​ຜ່ານ ສະຫວັນ​ເພັດ ຮອງ​ລັດຖະມົນຕີ​ກະຊວງ​ການ​ຕ່າງປະເທດ ທັງ​ເປັນ​ຫົວໜ້າ​ເຈົ້າ​ໜ້າທີ່​ອາວຸໂສ​ອາ​ຊຽນ ຂອງ ສປປ ລາວ ພ້ອມ​ດ້ວຍ​ຄະນະ ໄດ້​ເຂົ້າ​ຮ່ວມ​ກອງ​ປະຊຸມ​ເຈົ້າ​ໜ້າທີ່​ອາວຸໂສ​ອາ​ຊຽນ ເພື່ອ​ກະກຽມ​ດ້ານ​ເນື້ອ​ໃນ  ແລະ  ພາລະ​ທິ​ການ ໃຫ້​ແກ່​ກອງ​ປະຊຸມ​ລັດຖະມົນຕີ​ຕ່າງປະເທດ​ອາ​ຊຽນ​ແບບວົງ​ແຄບ ທີ່​​ຈະຈັດ​ຂຶ້ນ​ໃນ​ວັນ​ທີ 17 ມັງກອນ 2020 ໂດຍ​ການ​ເປັນ​ປະທານ ຂອງ ສສ ຫວຽດນາມ ພາຍ​ໃຕ້​ຄໍາ​ຂວັນ: “ອາ​ຊຽນ ທີ່​ໜຽວແໜ້ນ  ແລະ ຕອບ​ສະ ໜອງ​ຕໍ່​ສະພາບ​ການ (Cohesive and Responsive ASEAN)”. 
      ໃນ​ກອງ​ປະຊຸມ​ຄັ້ງ​ນີ້ ບັນດາ​ຫົວ​ໜ້າ​ເຈົ້າ​ໜ້າທີ່​ອາວຸໂສ​ອາ​ຊຽນ ໄດ້​ປຶກສາ​ຫາລື ກ່ຽວ​ກັບ​ການ​ສືບຕໍ່​ຮັດ​ແໜ້ນ​ປະຊາ​ຄົມ​ອາ​ຊຽນ​ໃຫ້​ມີ​ຄວາມ​ເຂັ້ມ​ແຂງ. ພ້ອມ​ກັນ​ນັ້ນ, ກໍ​ໄດ້​ຮັບ​ຊາບ​ຂໍ້​ລິ​ເລີ່ມ​ບຸ​ລິ​ມະ​ສິດ ສໍາ​ລັບ​ການ​ເປັນ​ປະທານ​ອາຊຽນ​ຂອງ ຫວຽດນາມ ທີ່​ເນັ້ນ​ໃສ່​ການ​ຮັດ​ແໜ້ນ​ຄວາມ​ສາມັກຄີ  ແລະ ຄວາມ​ເປັນ​ເອກະ​ພາບ​ຂອງ​ອາ​ຊຽນ, ເພີ່ມ​ທະວີ​ການ​ເຊື່ອມ​ໂຍງ ແລະ ການ​ເຊື່ອມ​ຈອດ​ອາ​ຊຽນ, ສົ່ງເສີມ​ເອກະລັກ​ຂອງ​ອາ​ຊຽນ, ເພີ່ມ​ທະວີ​ການ​ຮ່ວມ​ມື​ກັບ​ປະເທດ​ຄູ່​ຮ່ວມ​ມື​ໃນ​ໂລກ ແລະ ເພີ່ມ​ທະວີ​ຄວາມ​ອາດ​ສາມາດ ແລະ ປະສິດທິພາບ​ຂອງ​ສະ​ຖາ​ບັນ​ອາ​ຊຽນ. 
       ກອງ​ປະຊຸມ ຍັງ​ໄດ້​ປຶກສາ​ຫາລືກ່ຽວ​ກັບ​ການ​ຂໍ​ເຂົ້າ​ເປັນ​ພາຄີ​ສົນທິສັນຍາ ໄມຕີ​ຈິດ ແລະ ການ​ຮ່ວມ​ມື​ໃນ​ອາຊີ​ຕາເວັນ​ອອກສຽງ​ໃຕ້ (TAC) ຂອງ​ປະເທດ​ນອກ​ພາກ​ພື້ນ​ທີ່​ມີ​ຄວາມ​ສົນໃຈ, ໄດ້​ແລກປ່ຽນ​ຄຳ​ຄິດ​ຄຳ​ເຫັນ ກ່ຽວ​ກັບ​ການ​ເສີມ​ສ້າງ ຊຶ່ງ​ກັນ  ແລະ  ກັນ ລະຫວ່າງ ວິໄສ​ທັດ​ປະຊາ​ຄົມ​ອາ​ຊຽນ 2025 ແລະ ວາລະ​ການ​ພັດທະນາ​ແບບ​ຍືນ​ຍົງ 2030 ຂອງ​ອົງການ​ສະຫະ​ປະຊາ​ຊາດ.  ນອກ​ນີ້, ກອງ​ປະ ຊຸມ ໄດ້​ປຶກສາ​ຫາລືກ່ຽວ​ກັບ​ການ​ຮັດ​ແໜ້ນ​ການ​ພົວພັນ​ກັບ​ພາຍ​ນອກ ແລະ ການ​ສະເໜີ​ເຂົ້າ​ເປັນ​ຄູ່​ຮ່ວມ​ມື​ກັບ​ອາ​ຊຽນ​ຂອງ​ປະເທດ​ນອກ​ພາກ​ພື້ນ.  
(ຂ່າວ: ກະຊວງ​ການ​ຕ່າງປະເທດ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​