ຫົວ​ຂໍ້ : ທ່ານ ບຸນທອງ ຈິດມະນີ ເຄື່ອນໄຫວຊຸກຍູ້ ການກໍ່ສ້າງທາງລົດໄຟຢູ່ແຂວງວຽງຈັນ

ເຜີຍ​ແຜ່​ໂດຍ​: admin ເວ​ລາ: 16/01/2020 09:07:46 ຈຳ​ນວນ​ຜູ້​ເຂົ້າ​ຢ້ຽມ​ຊົມ 291 ຄັ້ງ

     ທ່ານ ບຸນ​ທອງ ຈິດມະ ນີ ກໍາ​ມະ​ການ​ກົມ​ການເມືອງ ​ສູນ​ກາງ​ພັກ ຄະນະ​ເລຂາທິ ການ​ສູນ​ກາງ​ພັກ ຮອງ​ນາຍົກ ລັດຖະມົນຕີ ປະທານ​ຄະນະ​ກວດກາ​ສູນ​ກາງ​ພັກ ປະທານ​ອົງການ​ກວດກາ​ລັດຖະບານ ແລະ ຫົວໜ້າ​ອົງການ​ຕ້ານ​ການ​ສໍ້​ລາດ​ບັງ​ຫຼວງ​ຂັ້ນ​ສູນ​ກາງ ຫົວໜ້າ​ຄະນະຊີ້​ນໍາ​ໂຄງການ​ກໍ່ສ້າງ​ທາງ​ລົດໄຟ​ລາວ ​- ​ຈີນ ພ້ອມ​ຄະນະ ໄດ້​ໄປ​ຢ້ຽມຢາມ ແລະ ຊຸກຍູ້​ການ​ກໍ່ສ້າງ​ທາງ​ລົດໄຟໂຄງການ​ກໍ່ສ້າງທາງ ລົດໄຟ ລາວ​-​ຈີນ ຢູ່ແຂວງ​ວຽງ​ຈັນ  ໂດຍ​ມີ​ທ່ານ ບຸນ​ຈັນ ສິນ​ທະ​ວົງ ກຳມະການ​ສູນ​ກາງ​ພັກ ລັດຖະມົນຕີ​ກະຊວງ​ໂຍທາ​ທິ​ການ ແລະ ຂົນສົ່ງ ຮ່ວມ​ລົງ​ເຄື່ອນ​ໄຫວ; ໃນ​ວັນ​ທີ 15 ມັງກອນ 2020 ໂດຍ​ມີ ທ່ານ  ຄໍາ​ພັນ ສິດ​ທິ​ດໍາ​ພາ  ກໍາ​ມະ​ການ​ສູນ​ກາງ​ພັກ ເລຂາ​ພັກ ແຂວງ ເຈົ້າແຂວງ​ວຽງຈັນ, ມີ​ຄະນະ​ປະ​ຈໍາ, ຄະນະ​ພັກ, ພະ ນັກງານຫຼັກ​ແຫຼ່ງ, ຄະນະຮັບ ຜິດຊອບ​ໂຄງການກໍ່ສ້າງ​ທາງ​ລົດໄຟ ​ລາວ​-​ຈີນ, ພະນັກງານ​ທີ່​ກ່ຽວຂ້ອງຕ້ອນຮັບ  ແລະ ຮ່ວມ​ເຮັດ​ວຽກ.
      ໂອກາດ​ນີ້​ ທ່ານຮອງນາ ຍົກລັດຖະມົນຕີ  ພ້ອມ​ຄະນະ   ໄດ້​ເດີນທາງ​ຢ້ຽມຢາມ, ຕິດ ຕາມ, ກວດກາ ແລະ ຊຸກຍູ້ ການ​ໄກ່​ເກ​ຍ​ສິ່ງ​ກີດຂວາງການ ​ເບີກ​ຈ່າຍ​ຄ່າ​ຊົດ​ເຊີຍ​ຜົນ​ກະ ທົບ​ຕໍ່​ພໍ່​ແມ່​ປະຊາຊົນ  ແລະ ກວດກາ​ການ​ກໍ່ສ້າງ​ຕົວ​ຈິງ ຂອງ​ໂຄງການ​ກໍ່ສ້າງ​ທາງ​ລົດໄຟ​ລາວ​-​ຈີນ ຢູ່​ບ້ານ​ຫ້ວຍ​ເລີດ, ບ້ານ​ໂພນ​ທອງ ເມືອງ​ຫີນ​ເຫີບ ສະຖານີ ວັງ​ວຽງ ບ້ານ​ປາກ ເປາະ, ສົມ​ສະຫວາດ ເມືອງ​ວັງ​ວຽງ ແລະ ສະຖານີ​ກາສີ ເມືອງ​ກາສີ​ ແຂວງ​ວຽງ​ຈັນ.
      ທ່ານຮອງ​ນາຍົກລັດຖະ ມົນຕີ​ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ຄະນະ​ຮັບຜິດຊອບ ແລະ ພໍ່​ແມ່​ປະຊາຊົນ​ຢູ່​ແຕ່ລະ​ ຈຸດທີ່​ໄດ້​ເອົາໃຈໃສ່ໃຫ້​ຄວາມ​ຮ່ວມ​ມື ແລະ ອໍາ​ນວຍ​ຄວາມ​ສະດວກ​ໃຫ້​ແກ່​ການ​ກໍ່ສ້າງ ເຮັດ​ໃຫ້ການ​ກໍ່​ສ້າງ​ດໍາ​ເນີນ​ໄປ​ຢ່າງ​ຄ່ອງ​ແຄ້ວ  ພ້ອມ​ນີ້້​ກໍ​ໄດ້​ເນັ້ນ​ໃຫ້​ຄະນະ​ຮັບຜິດຊອບ​ໄກ່​ເກ່ຍ​ສິ່ງ​ກີດຂວາງ​ໃຫ້​ຮີບ​ຮ້ອນ​ແກ້​ໄຂ​ຈຸດ​ທີ່​ຍັງ​ຄ້າງ​ຄາ​ໃຫ້​ສໍາ​ເລັດ​ໂດຍ​ໄວ ເປັນຕົ້ນ​ການ​ບຸກເບີກ​ພື້ນ​ທີ່​ເພື່ອ​ຍົກຍ້າຍ​ປ່າຊ້າ  ແລະ ໄກ່​ເກ່ຍ​ພື້ນ​ທີ່​  ເພື່ອ​ສ້າງ​ທາງ 13 ເໜືອ​ໃໝ່ ຢູ່​ບ້ານ​ຫ້ວຍ​​ເລີດ  ເມືອງ​ວັງ​ວຽງ  ແລະ  ບ່ອນ​ອື່ນໆ​ອີກ ເພື່ອ​ໃຫ້​ການ​ດໍາ​ເນີນ​ການ​ກໍ່ສ້າງ​ທາງ​ລົດ​ໄຟ​ດໍາ​ເນີນ​ໄປ​ຢ່າງ​ຕໍ່​ເນື່ອງ ແລະ ສາ​ມາດ​ສໍາ​ເລັດ​ຕາມ​ເວລາ​ທີ່​ກໍາ​ນົດ​ໄວ້.
       ໂຄງການ​ກໍ່ສ້າງ​ທາງ​ລົດ ໄຟ​ ລາວ​-​ຈີນ​ ໄລ​ຍະ​ຜ່ານ​ແຂວງ​ ວຽງ​ຈັນ​ມີ​ຄວາມ​ຍາວທັງ​ໝົດ 145,69 ກິໂລແມັດ, ສາມາດ​ໄກ່​ເກ່ຍ ແລະ ມອບ​ພື້ນ​ທີ່ໃຫ້​ໂຄງການ​ແລ້ວ 145,06 ກິໂລ ແມັດ ເທົ່າ​ກັບ 99,58 ສ່ວນ​ຮ້ອຍ. ຄວາມ​ຍາວທັງ​ໝົດ 145,69 ກມ, ຜ່ານ 4 ເມືອງ, 60 ບ້ານ​ຄື: ເມືອງ​ກາສີ 9 ບ້ານ, ເມືອງ​ວັງ​ວຽງ 16 ບ້ານ, ເມືອງ​ຫີນ​ເຫີບ 11 ບ້ານ ແລະ ເມືອງ​ໂພນ​ໂຮງ 24 ບ້ານ, ມີ​ຄອບ​ຄົວ​ທ່ີ​ໄດ້​ຮັບຜົນ​ກະທົບ 1.589 ຄອບຄົວ ລວມ​ມູນ​ຄ່າ​ຊົດ​ເຊີຍ​ທັງ​ໝົດ 290.306.024.193 ກີບ (ຍັງ​ບໍ່​ໄດ້​ລວມ​ເຖິງ​ຜົນ​ກະທົບ​ທາງ​ເຂົ້າ​ສະຖານ​ນີ 3 ແຫ່ງ, ຜົນ​ກະ ທົບ​ຈາກ​ການ​ຍົກຍ້າຍ​ແລວ​ທາງ​ຕ່າງໆ​ທີ່​ທາງ​ລົດໄຟ​ຕັດ​ຜ່ານ​ທີ່​ຈະ​ໄດ້​ກໍ່ສ້າງ​ຄືນ, ຜົນ​ກະທົບ​ຈາກ​ການ​ຍົກຍ້າຍ​ໄຟຟ້າ​ແຮງ​ສູງ.  ຄາດ​ວ່າ​ມູນ​ຄ່າ​ການ​ຊົດ​ເຊີຍ​ຈະ ​ເພີ່ນ​ຂຶ້ນ​ອີກ)  ການຊົດເຊີຍມາ​ ຮອດ​ບັດ​ຈຸ​ບັນໄດ້​ຮັບງົບປະ ມານ​ທັງ​ໝົດ 7 ງວດ ມູນ​ຄ່າ 204.055.582.200 ກີບ ໃນ​ນັ້ນ ຈ່າຍ​ໃຫ້​ຄອບຄົວ​ຜູ້​ຖືກ​ຜົນ​ກະທົບ 965 ຄອບຄົວ, ປ່າຊ້າ 3 ແຫ່ງ, ໂຮງຮຽນ​ປະຖົມ 3 ຫຼັງ. ກໍາ​ລັງ​ສະເໜີ​ຂໍ​ຊໍາ​ລະ​ໃນ​ງວດ 8 ລວມ 346 ຄອບຄົວ ໃນ​ນັ້ນເຂດ​ແລວ​ທາງ​ລົດໄຟ 281 ຄອບຄົວ ແລະ ກະທົບ​ນອກ​ແລວ​ທາງ​ເວັ້ນ​ຕ່າງໆ ແລະ ແລວ​ໄຟຟ້າ 65 ຄອບຄົວ ລວມ​ມູນ​ຄ່າ 40.636.873.000 ກີບ.
      ຍັງ​ຈະ​ສືບຕໍ່​ລົງ​ຢັ້ງຢືນ​ຂໍ້​ມູນ​ຜົນ​ກະ​ທົບ​ນໍາ​ປະຊາຊົນ ໜຶ່ງ​ສະເໜີ​ເຂົ້າ​ແຜນ​ຊົດ​ເຊີຍ ມີ 343 ຄອບຄົວ.
(ຂ່າວ: ແສງ​ເພັດ ແຊ່​ຈ່າວ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​