ຫົວ​ຂໍ້ : ພະແນກແຜນການ ແລະ ການລົງທຶນແຂວງສາລະວັນ ຮັບສະມາຊິກພັກສຳຮອງ ຂຶ້ນສົມບູນ 6 ສະຫາຍ

ເຜີຍ​ແຜ່​ໂດຍ​: ທ່ານ ຈັນ​ທະ​ໄມ​ຕ​ຣີ ເທບ​ສີ​ເມືອງ ເວ​ລາ: 08/01/2020 10:05:51 ຈຳ​ນວນ​ຜູ້​ເຂົ້າ​ຢ້ຽມ​ຊົມ 386 ຄັ້ງ

    ໃນ​ວັນ​ທີ 3 ມັງກອນ ຜ່ານ​ມາ ທີ່​ພະ​ແນ​ກ​ແຜນການ ແລະ ການ​ລົງທຶນ​ແຂວງສາລະ​ວັນ ໄດ້​ຈັດ​ພິທີ​ເລື່ອນ​ສະມາຊິກ​ພັກ​ສຳຮອງ​ຂຶ້ນ​ເປັນ​ສະມາຊິກ​ພັກ​ສົມບູນ 6 ສະຫາຍ, ຍິງ 1 ສະຫາຍ ຂອງ​ໜ່ວຍ​ພັກ​ພະ​ແນກ​ແຜນການ ແລະ​ ການ​ລົງທຶນ​ແຂວງ, ໂດຍ​ການ​ເປັນ​ປະທານ​ຂອງ ສະຫາຍ ໂພ​ສີ ແກ້ວ​ສີ​ພັນ​ດອນ ເລຂາ​ໜ່ວຍ​ພັກ​ພະ​ແນ​ກ​ແຜນການ ແລະ ການ​ລົງທຶນ​ແຂວງ, ມີ​ສະມາຊິກ​ພັກ​ສົມບູນ ແລະ ສຳຮອງເຂົ້າ​ຮ່ວມ.
    ສະມາຊິກ​ພັກ​ສຳຮອງ​ຂຶ້ນ​ເປັນ​ສະມາຊິກ​ພັກ​ສົມບູນ 6 ສະຫາຍ, ຍິງ 1 ສະຫາຍ ທີ່​ມາ​ຈາກ​ໜ່ວຍ​ພັກ​ພະ​ແນ​ກ​ແຜນການ ແລະ​ ການ​ລົງທຶນ​ແຂວງ  ນີ້​ແມ່ນ​ໄດ້​ຜ່ານ​ການ​ຝຶກ​ຝົນ​ຫຼໍ່​ຫຼອມ, ຕິດຕາມ ແລະ ປະ​ເມີນ ຈາກ​ຄະນະ​ພັກ, ສະມາຊິກ​ພັກ​ສົມບູນ ເຫັນ​ໄດ້​ວ່າ​ຜູ້ກ່ຽວ​ເປັນ​ຄົນ​ທີ່​ມີ​ຄຸນສົມບັດ​ສິນ​ທຳ​ປະຕິວັດ, ມີ​ຄວາມ​ຮູ້, ຄວາມ​ສາມາດ, ມີ​ຄວາມ​ສາມັກຄີ​ພາຍ​ໃນ ແລະ​ ນອກ​ຢ່າງ​ກວ້າ​ຂວາງ, ມີ​ແບບແຜນ​ວິທີ​ເຮັດ​ວຽກ, ມີ​ຄວາມ​ຫ້າວຫັນ​ສູ້​ຊົນ ແລະ​ເຮັດ​ສໍາ​ເລັດ​ໜ້າທີ່​ວຽກ​ງານ​ທີ່​ການຈັດຕັ້ງ​ໄດ້​ມອບ​ໝາຍ​ຈາກ​ຂັ້ນ​ເທິງ, ພ້ອມ​ທັງ​ມີ​ຄວາມ​ຮັບ ຜິດຊອບ​ສູງ ແລະ ​ຜົນ​ສໍາ​ເລັດ​ຫຼາຍ​ດ້ານ.
    ຈາກນັ້ນ​ກໍໄດ້​ຮັບ​ຟັງ​ຄຳ​ໂອ້​ລົມ​ຈາກ ສະຫາຍ ໂພສີ ແກ້ວ​ສີ​ພັນ​ດອນ  ກ່ອນ​ອື່ນກໍໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ບັນດາ​ສະຫາຍ​ສະມາຊິກ​ພັກ​ໃໝ່ ທີ່​ມີ​ຄວາມ​ຫ້າວຫັນ, ດຸໝັ່ນອົດທົນເຮັດສຳເລັດ​ໜ້າທີ່​ວຽກ​ງານ​ທີ່​ມອບ​ໝາຍ​ໃຫ້ ຈົນ​ສາມາດ​ເລື່ອນ​ຂຶ້ນເປັນ​ ສະມາຊິກ​ພັກ​ສົມບູນ​ໃໝ່​ໄດ້, ພ້ອມ​ນັ້ນ​ກໍ​ໄດ້​ແນະນຳ​ໃຫ້​ສະມາຊິກ​ພັກ​ໃໝ່​ໄດ້​ຮັບ​ຮູ້, ເຂົ້າໃຈກ່ຽວ​ກັບ​ຄວາມໝາຍ​ ຂອງ​ທຸງ​ພັກ, ທຸງຊາດ, ສິດ, ໜ້າທີ່, ພັນທະ ແລະ​ ຜົນ​ປະໂຫຍດໃນ​ການ​ປະຕິບັດ​ຕາມ 5 ຫຼັກການ, 3 ທິດ​ນໍາ​ຂອງ​ພັກ ແລະ 9 ຂໍ້​ຫ້າມ​ສຳລັບ​ສະມາຊິກ​ພັກ ເພື່ອ​ທີ່​ຈະ​ນຳໄປ​ຝຶກ​ຝົນ​ຫຼໍ່​ຫຼອມ​ຕົນ​ເອງ​ໃຫ້​ກາຍເປັນ​ສະມາຊິກ​ທີ່​ດີ​ໃນ​ຕໍ່​ໜ້າ.  (ພາບ​-​ຂ່າວ: ທິດ​ລາ​ນີ ໂຄດ​ໂຍທາ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​