ຫົວ​ຂໍ້ : ລາວ​-​ຫວຽດ­ນາມ ເພີ່ມ​ທະ­ວີ​ການ​ຮ່ວມ​ມື​ສອງ​ຝ່າຍ

ເຜີຍ​ແຜ່​ໂດຍ​: admin ເວ​ລາ: 27/12/2019 14:30:11 ຈຳ​ນວນ​ຜູ້​ເຂົ້າ​ຢ້ຽມ​ຊົມ 229 ຄັ້ງ

ພິທີ​ພົບ​ປະ​ສອງ​ຝ່າຍ ລະ ຫວ່າງກະຊວງຖະແຫຼງ​ຂ່າວ, ວັດທະນະທຳ ​ແລະ ​ທ່ອງ​ທ່ຽວ (ຖວທ) ສປປ ລາວ ແລະ ກະ​ຊວງ​ວັດ​ທະນະ​ທຳ, ກິລາ ແລະ ທ່ອງ​ທ່ຽວ (ວກທ) ສສ​ຫວຽດນາມ ໄດ້​ຈັດ​ຂຶ້ນ​ໃນ​ວັນ​ທີ 5 ທັນວາ​ນີ້ ທີ່​ນະຄອນຫຼວງວຽງ​ ຈັນ​ ຝ່າຍ​ລາວ ນໍາ​ໂດຍ​ທ່ານ ກິ​ແກ້ວ​ ໄຂ​ຄຳ​ພິທູນ​ ເລຂາທິ ການ​ສູນ​ກາງ​ພັກ ເລຂາຄະນະ​ພັກ ລັດຖະມົນຕີ​ກະ​ຊວງ​ ຖວທ, ຝ່າຍ​ຫວຽດນາມ ​ນໍາ​ໂດຍ​ທ່ານ ຫ​ງວຽນ ຫງອກ ຖຽນ ກຳມະ ການ​ສູນ​ກາງ​ພັກ ລັດຖະມົນຕີ ກະ​ຊວງ​ ວກທ ພ້ອມ​ດ້ວຍ​ຄະ ນະ​ຜູ້​ແທນ​ທັງ​ສອງ​ຝ່າຍ​ເຂົ້າ​ຮ່ວມ.

   ການ​ພົບ​ປະ​ຄັ້ງ​ນີ້, ທ່ານ ​ກິ​ແກ້ວ ​ໄຂ​ຄຳ​ພິທູນ ໄດ້​ກ່າວ​ສະແດງ​ຄວາມ​ຕ້ອນຮັບ​ຢ່າງ​ອົບ​ອຸ່ນ​ຕໍ່​ທ່ານ​ ຫງວຽນ ຫງອກ ຖຽນ ພ້ອມ​ດ້ວຍ​ຄະນະ ທີ່ເດີນ ທາງ​ມາ​ຢ້ຽມຢາມ ແລະ ເຮັດ​ວຽກ ຢູ່ ສປປ ລາວ​ ຊຶ່ງ​ເປັນ​ການສະແດງ​ອອກ​ເຖິງຄວາມ​ເອົາໃຈໃສ່, ຖື​ສຳຄັນຕໍ່​ສາຍ​ພົວພັນ​ຮ່ວມ​ມື​ຂອງ​ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ​ພວກ​ເຮົາ ໂດຍ​ສະເພາະ​ຕໍ່​ການ​ພົວພັນ​ຮ່ວມ​ມືຂອງ​ ​ສອງ​ກະຊວງ​ໄດ້ນຳ​ເອົາໄມຕີ​ ຈິດ​ມິດຕະພາບຖານ​ມິດ​ສະ ຫາຍ​ອ້າຍ​ນ້ອງທີ່ເປັນ​ການ​ຊຸກ​ດັນ​ປຸກລະດົມ​ກຳລັງ​ໃຈ ​ເຮັດ​ສຳເລັດ​ໜ້າທີ່​ການເມືອງ​ຂອງ​ຕົນ. ໃນການ​ຮ່ວມ​ມື​ຮອບດ້ານລະ ຫວ່າງ​ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ ​ລາວ​-​ຫວຽດນາມສືບຕໍ່​ຂະຫຍາຍຕົວ​ເຂົ້າ​ສູ່​ລວງ​ເລິກ. ການພົບ​ປະ​ຍັງ​ໄດ້​ແລກປ່ຽນ​​ກັນຫຼາຍ​ບັນຫາ ​​ໃນດ້ານ​ວັດທະນະທຳ, ທ່ອງ​ທ່ຽວ ແລະ ທິດ​ທາງ​ການ​ຮ່ວມມື ໃນ​ຕໍ່​ໜ້າ​ຂອງ​ຂົງເຂດ ຖວທ.

   ໃນ​ວັນ​ດຽວ​ກັນ​ ຄະນະ​ຜູ້​ແທນ​ດັ່ງກ່າວ​ກໍໄດ້​ເຂົ້າ​ຮ່ວມ​ເປີດງານສັບປະດາ​ວັດທະນະ ທຳ​ຫວຽດນາມ ທີ່​ຫໍ​ວັດທະນະ ທຳ​ແຫ່ງ​ຊາດ​ຂອງ​ລາວ ຊຶ່ງ​ແມ່ນ​ກິດ​ຈະ​ກໍາ​ໜຶ່ງ​ທີ່​ມີ​ຄວາມ​ໝາຍ​​ສໍາ​ຄັນ ແລະ ເປັນ​ການ ຈັດຕັ້ງ​ຜັນ​ຂະຫຍາຍ​ແຜນການ ​ຮ່ວມ​ມື​ດ້ານວັດ​ທະ​ນະ​ທໍາ ແລະ ທ່ອງ​ທ່ຽວ ລະຫວ່າງສອງ​ກະ​ຊວງ​ໃນສົກ​ປີ 2016-2020 ແລະ ແຜນ​ຈັດ​ຕັ້ງ​ປະຕິບັດ​ກິດ​ຈະ​ກໍາ ປະຈຳ​ປີ 2019.

   ການ​ຈັດ​ງານ​ສັບປະດາວັດ ທະນະທຳ ສສ ຫວຽດນາມ ທີ່​ ສປປ ລາວ ຄັ້ງ​ນີ້​ ບັນດາ​ທ່ານຈະ​ໄດ້​ຮັບ​ຊົມ​ການສະແດງ​ສິລະ​ປະ​ວັນນະຄະດີ​ຈາກ​ນັກ​ສິລະ​ປິນທີ່​ໂດດ​ເດັ່ນ​ຂອງ​ຫວຽດນາມ ຊຶ່ງ​ຈະ​ໄດ້​ນໍາ​ສະເໜີໃຫ້​ບັນດາ​ທ່ານໄດ້​ຮັບ​ຮູ້ຄວາມ​ຫຼາກ​ຫຼາຍ​ທາງ​ດ້ານ​ສິລະ​ປະວັດ​ທະນະ​ ທຳ​ອັນ​ຍອດ​ຍິ່ງ​ຂອງປະຊາຊົນ​ຊາວ​ຫວຽດນາມ ​ ໃນ​ການ​ປົກປັກ​ຮັກສາ​ ແລະ ​ສ້າງສາ​ພັດທະນາ​ປະເທດ​ຊາດ​ຂອງ​ຕົນ​ພາຍ​ໃຕ້​ການ​ນໍາ​ພາ​ອັນ​ສະຫຼາດ​ສ່ອງ​ໃສ​ຂອງ​ພັກກອມ​ມູ​ນິດ​ຫວຽດນາມ. ພ້ອມ​ນີ້​ກໍຍັງ​ໄດ້​ສະແດງ​ໃຫ້​ເຫັນ​ລວງ​ເລິກ ​ແລະ​ ປະສິດທິພາບ​ທີ່​ມີມິດຕະພາບ​ອັນ​ຍິ່ງ​ໃຫຍ່, ຄວາມ​ສາມັກຄີພິເສດ​ຂອງ​ສອງ​ຊາດ​ ລາວ-ຫວຽດນາມ.
(ຂ່າວ​-​ພາບ: ພູ​ວັນ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​